काठमाडौं । नजिकिएको चाड संगै तिहारमा बढी खपत हुने वस्तुमध्ये एक चिनीपनि हो यस वर्ष अभाव नहुने सरोकारवालाले बताएका छन् ।
निजी क्षेत्र तथा सरकारी निकायले पर्याप्त मौज्दात तथा आयात गरेका कारण बजारमा अभाव नहुने उनीहरूको दाबी छ । खाद्य तथा व्यापार कम्पनी लिमिटेडका सूचना अधिकारी शर्मिला न्यौपानेका अनुसार यस वर्ष कम्पनीले मात्र १ सय ५० टन चिनी खरिद गरी नेपाल ल्याउने क्रममा रहेको र अहिले पनि साल्ट ट्रेडिङ कर्पोरेसनबाट चिनी ल्याएर बजारमा वितरण भइरहेको उनले जानकारी दिइन् ।
उनका अनुसार अहिले प्रतिकिलो १ सय २ रुपैयाँमा चिनी बिक्री भइरहेको छ । थप चिनी आउने क्रममा रहेका कारण यस वर्ष चाडबाडमा मूल्यसमेत धेरै नबढ्ने उनको भनाइ छ ।
साल्ट ट्रेडिङ कर्पोरेसन लिमिटेडका अनुसार यस वर्ष दशैंबाट पर्याप्त चिनी बजार पठाइएको छ । जसले गर्दा व्यापारीले कृत्रिम अभाव सिर्जना गर्ने मौका पाउने छैन ।
कम्पनीका सूचना अधिकारी कुमार राजभण्डारीका अनुसार अहिले एक उपभोक्तालाई अधिकतम ६ किलोसम्म चिनी साल्ट ट्रेडिङबाट बिक्री भइरहेको छ । सोहीकारण अभाव होला वा मूल्य बढेर समस्या होला कि भन्ने समस्या चिनीमा नरहेको उनको भनाइ छ ।
‘हामीले आयातकर्ता समक्ष मूल्य विवरण नै मागेर अनुगमन गरेका छौं,’ उनले भने, ‘बढी मूल्य राखेको पाइए हामी कडा कारबाही गर्छौं ।’
यस वर्ष सुजी र मैदाको कमी बजारमा देखिएको उनले बताए । यसको समाधानका लागि गहुँ आयात खुकुलो बनाउने प्रयास गरिरहेको उनले जानकारी दिए ।
