काठमाडौं । बैंकिङ कसुरको अभियोगमा मुद्दा खेपिरहेका व्यवसायी दीपक भट्ट, शंकरलाल अग्रवालसहितका प्रतिवादीहरूको बयान उच्च अदालत पाटनमा सुरु भएको छ। उनीहरूविरुद्ध ४२ करोड १४ लाख रुपैयाँभन्दा बढी बिगो दाबी गर्दै गएको जेठ २८ गते मुद्दा दायर गरिएको थियो।
उच्च अदालत पाटनका न्यायाधीशद्वय अर्जुनप्रसाद कोइराला र कविप्रसाद न्यौपानेको संयुक्त इजलासमा प्रतिवादीहरूको बयान भइरहेको हो। मुद्दामा इन्फिनिटी होल्डिङ्सका अध्यक्ष दीपक भट्ट, जगदम्बा स्टील्सका सञ्चालक शंकरलाल अग्रवाल, शुलभ अग्रवाल र शाहिल अग्रवाललाई प्रतिवादी बनाइएको छ।
अभियोगपत्रअनुसार प्रतिवादीहरूले मिलेमतोमा बैंकबाट लिएको चालु पुँजी कर्जा ९वर्किङ क्यापिटल लोन० दुरुपयोग गरी अन्य प्रयोजनमा खर्च गरेको आरोप छ। मुद्दा दर्ता हुँदा फरार रहेका शंकरलाल अग्रवाललाई नेपाल प्रहरीको केन्द्रीय अनुसन्धान ब्युरो ९सीआईबी०ले बुधबार पक्राउ गरी अदालतमा उपस्थित गराएपछि उनको पनि बयान लिइँदै छ।
सरकारी पक्षका अनुसार जगदम्बा स्टील्सले विभिन्न बैंकबाट औद्योगिक कच्चापदार्थ खरिद र दैनिक सञ्चालनका लागि लिएको कर्जा दीपक भट्टको सिद्धार्थ बैंकस्थित व्यक्तिगत खातामा स्थानान्तरण गरेको थियो। त्यसपछि उक्त रकम इन्फिनिटी होल्डिङ्सको खातामा सारेर हिमालयन रि–इन्स्योरेन्सको संस्थापक सेयर खरिदलगायत व्यक्तिगत लाभका लागि प्रयोग गरिएको आरोप लगाइएको छ।
अनुसन्धानबाट जगदम्बा स्टील्सले नेपाल इन्भेष्टमेन्ट मेगा बैंक, नेपाल एसबिआई बैंक, कुमारी बैंक, एभरेष्ट बैंक, कृषि विकास बैंकलगायत वित्तीय संस्थाबाट लिएको कर्जा उद्देश्यविपरीत प्रयोग गरी रकमको लेयरिङ ९तहकीकरण० गरिएको दाबी अभियोगपत्रमा गरिएको छ।
सरकारी वकिल कार्यालयले प्रतिवादीहरूबाट ४२ करोड १४ लाख ८८ हजार ८०७ रुपैयाँ ७ पैसा बिगो असुल गर्न तथा बैंकिङ कसुर तथा सजाय ऐन, २०६४ को दफा १५९२०९ङ० बमोजिम बिगोबराबर जरिबाना र कैद सजायको माग गरेको छ।
बयानपछि थुनछेक बहस
प्रतिवादीहरूको बयान सकिएपछि सोही इजलासमा थुनछेक बहस हुनेछ। बहसपछि अदालतले मुद्दाको अन्तिम किनारा नलागेसम्म प्रतिवादीहरूलाई पुर्पक्षका लागि थुनामा पठाउने, धरौटीमा रिहा गर्ने वा साधारण तारिखमा छाड्ने भन्नेबारे आदेश जारी गर्नेछ।
