काठमाडौं । काठमाडौं महानगरपालिका–६ बौद्ध गेट नजिक २७ वर्षीया एक युवतीले पेट्रोल छर्केर आत्मदाहको प्रयास गरेकी छन्।
जिल्ला प्रहरी परिसर काठमाडौंका अनुसार काभ्रेपलाञ्चोकको तेमाल गाउँपालिका–३ घर भई बौद्धमा खाजा पसल सञ्चालन गर्दै आएकी सालु गुरुङले सोमबार राति करिब २:५० बजे आफ्नै पसलको पछाडिको पार्किङ क्षेत्रमा शरीरमा पेट्रोल छर्केर आगो लगाएकी हुन्।
घटनापछि उनका श्रीमानले तत्काल उद्धार गरी सुश्मा कोइराला मेमोरियल अस्पताल, साँखु पुर्याएका थिए। त्यहाँबाट थप उपचारका लागि कीर्तिपुरस्थित बर्न अस्पताल रेफर गरिएको छ। अस्पतालका निर्देशक डा. किरण नकर्मीका अनुसार उनको शरीरको करिब २५–३० प्रतिशत भाग जलेको छ र हाल आईसीयूमा उपचार भइरहेको छ।
प्रहरीको प्रारम्भिक अनुसन्धानअनुसार घरायसी विवादपछि उनले यस्तो कदम चालेको देखिएको छ। घटनाबारे थप अनुसन्धान जारी रहेको प्रहरीले जनाएको छ।
