काठमाडौं । दुग्ध विकास संस्थान (डीडीसी)ले आर्थिक वर्ष २०८२/८३ मा करिब चार अर्ब रुपैयाँ बराबरको कारोबार गर्दै करिब ६ करोड लिटर दूध प्रशोधन तथा बजारीकरण गरेको जनाएको छ। गत वर्ष अत्यधिक दूध उत्पादनका कारण बटर र दूध पाउडरको ठूलो मौज्दात हुँदा किसानलाई समयमै भुक्तानी गर्न नसकिए पनि अहिले बक्यौता भुक्तानीको अवधि छ–सात महिनाबाट घटेर दुई–तीन महिनामा सीमित भएको संस्थानले जनाएको छ।
डीडीसीका प्रवक्ता निलकण्ठ गौतमका अनुसार फ्लस सिजनमा बढी संकलित दूधलाई पाउडर र बटर बनाएर भण्डारण गर्नुपर्दा नगद प्रवाहमा समस्या आएको थियो। अहिले मौज्दात क्रमशः बिक्री भइरहेकाले किसानको भुक्तानी सहज बन्दै गएको उनले बताए।
उनका अनुसार डीडीसीले पूर्व मेचीदेखि पश्चिम महाकालीसम्मका किसानबाट दूध संकलन गर्दै दुर्गम क्षेत्रका उत्पादनलाई समेत बजारसम्म पुर्याउने काम गरिरहेको छ। यही सेवामूलक दायित्वका कारण निजी डेरीको तुलनामा ढुवानी, कोल्ड चेन र व्यवस्थापनमा बढी लागत व्यहोर्नुपरेको उनले बताए।
डीडीसीले यस वर्षदेखि मोहीलाई नयाँ ब्रान्डिङसहित कोल्ड ड्रिंकको स्वदेशी विकल्पका रूपमा प्रवर्द्धन गर्न थालेको जनाएको छ। साथै, नयाँ सरकारले स्वदेशी उत्पादन प्रवर्द्धनमा देखाएको चासोले डीडीसीका उत्पादनको बिक्रीमा सकारात्मक प्रभाव परेको पनि संस्थानको दाबी छ।
हाल डीडीसीसँग करिब ५०० मेट्रिक टन बटर र ७०० मेट्रिक टन दूध पाउडर मौज्दात रहेको र ती क्रमशः बिक्री भइरहेको जनाएको छ। संस्थानले निजी डेरीसँगको प्रतिस्पर्धा चुनौतीपूर्ण भए पनि गुणस्तरमा आफू अग्रस्थानमा रहेको दाबी
