काठमाडौं। अमेरिकामा रगतको मौज्दात गम्भीर रूपमा घटेपछि अमेरिकन रेडक्रसले आफ्नो १५० वर्षको इतिहासमै दोस्रो पटक रगतको भण्डारण ‘संकट’ स्तरमा पुगेको घोषणा गरेको छ।

Advertisement

बीबीसीका अनुसार जंगलमा लागेको डढेलो, अत्यधिक गर्मी तथा अन्य कारणले रगत संकलन प्रभावित हुँदा पछिल्लो एक महिनामै रगतको मौज्दात करिब २५ प्रतिशतले घटेको हो। गर्मीयाममा सडक दुर्घटना र आकस्मिक शल्यक्रियाका बिरामी बढ्ने भएकाले रगतको माग पनि उच्च हुने गरेको बताइएको छ।

अमेरिकामा आवश्यक पर्ने रगतमध्ये करिब ४० प्रतिशत आपूर्ति गर्ने अमेरिकन रेडक्रसले हाल सामान्य अवस्थाभन्दा दैनिक करिब ३,५०० युनिट बढी रगत वितरण गरिरहेको जनाएको छ। दान गरिएको रगत ४२ दिनभित्र प्रयोग गरिसक्नुपर्ने भएकाले नयाँ रक्तदानका लागि रेडक्रसले सर्वसाधारणलाई आग्रह गरेको छ।