काठमाडौं । इरानले आफ्नो सुरक्षा र सार्वभौमिकताविरुद्ध हुने कुनै पनि सैन्य अभियानमा सहयोग गर्ने मुलुकलाई प्रत्यक्ष जिम्मेवार ठहर गर्दै कडा चेतावनी दिएको छ। आफ्नो भूमि, हवाई क्षेत्र वा सैन्य अड्डा प्रयोग गर्न दिने राष्ट्रहरू पनि जवाफी कारबाहीको दायरामा पर्ने इरानले स्पष्ट पारेको हो।
इरानको विदेश मन्त्रालयले सोमबार जारी गरेको विज्ञप्तिमा अमेरिकाले हालै गरेको सैन्य आक्रमणले युद्धविरामपछि बनेको सहमतिको भावना विपरीत काम गरेको आरोप लगाइएको छ। बीबीसी फारसीका अनुसार, तेहरानले अमेरिकाको पछिल्लो कदमलाई तनाव झन् बढाउने प्रयासका रूपमा व्याख्या गरेको छ।
विज्ञप्तिमा अमेरिकी आक्रमणका क्रममा यातायात पूर्वाधार, माछा मार्ने डुङ्गा, मालवाहक जहाज, मौसमसम्बन्धी सरकारी संरचना तथा अन्य नागरिक प्रयोजनका पूर्वाधार प्रभावित भएको दाबी गरिएको छ। इरानले यस्ता गतिविधिलाई अन्तर्राष्ट्रिय कानुनविपरीत भएको भन्दै युद्ध अपराधको संज्ञा दिएको छ।
विदेश मन्त्रालयले छिमेकी तथा खाडी क्षेत्रका राष्ट्रहरूलाई आफ्नो भूमि वा सैन्य सुविधा कुनै पनि आक्रमणकारी शक्तिले प्रयोग गर्न नदिन अन्तर्राष्ट्रिय कानुनले दायित्व तोकेको उल्लेख गरेको छ।
साथै, इरानले आफ्नो विरुद्ध सञ्चालन हुने कुनै पनि सैन्य कारबाहीमा प्रत्यक्ष वा अप्रत्यक्ष सहयोग गर्ने मुलुक वा स्थानलाई आवश्यक परे सैन्य जवाफ दिइने चेतावनी दोहोर्याएको छ। यसले मध्यपूर्व क्षेत्रमा सुरक्षा चुनौती थप जटिल बन्न सक्ने संकेत गरेको विश्लेषण गरिएको छ।
