काठमाडौं । मध्य चीनको हुबेई प्रान्तमा सोमबार राति आएको भीषण आँधीबेहरी र चक्रवातका कारण कम्तीमा ११ जनाको मृत्यु भएको छ भने ३३१ जना घाइते भएका छन्। स्थानीय अधिकारीहरूका अनुसार घटनामा एक जना अझै बेपत्ता छन्।
सोमबार साँझदेखि रातिसम्म आएको शक्तिशाली मेघगर्जन, हावाहुरी र चक्रवातले हुबेईका हुआङ्सी, हुआङ्गाङ, एजोउ र सियानिङलगायतका क्षेत्रमा ठूलो जनधनको क्षति पुर्याएको हो। केही स्थानमा हावाको गति अत्यन्त तीव्र रहेको र चक्रवातले बस्ती तथा पूर्वाधारमा व्यापक असर परेको जनाइएको छ।
प्राकृतिक विपत्तिका कारण २२ वटा भवन पूर्ण रूपमा ध्वस्त भएका छन् भने करिब ४ हजार ८ सयभन्दा बढी घर तथा अन्य संरचनामा आंशिक वा पूर्ण क्षति पुगेको स्थानीय प्रशासनले जनाएको छ। विद्युत्, यातायात तथा सञ्चार सेवासमेत प्रभावित भएका छन्।
घटनापछि प्रान्तीय सरकारले प्रभावित क्षेत्रमा उद्धार तथा राहत अभियान तीव्र बनाएको छ। सुरक्षाकर्मी, स्वास्थ्यकर्मी र विपद् व्यवस्थापन टोलीलाई परिचालन गरी घाइतेहरूको उपचार, बेपत्ताको खोजी तथा जोखिमयुक्त क्षेत्रका बासिन्दाको सुरक्षित स्थानमा व्यवस्थापन गर्ने काम भइरहेको छ।
अधिकारीहरूले मौसम अझै प्रतिकूल रहन सक्ने चेतावनी दिँदै नागरिकलाई सतर्क रहन र आवश्यक नपरेसम्म जोखिमयुक्त क्षेत्रमा नजान आग्रह गरेका छन्।
(सिन्ह्वाको सहयोगमा)
