फिफा विश्वकप २०२६ अन्तर्गत समूह ‘सी’ को आफ्नो पहिलो खेलमा ब्राजिलले मोरक्कोसँग १–१ को बराबरी खेल्दै प्रतियोगिताको सुरुआत गरेको छ।
आइतबार बिहान न्यू जर्सी स्टेडियममा सम्पन्न खेलमा मोरक्कोले २१औं मिनेटमा इस्माइल साइबारीको गोलमार्फत अग्रता लिएको थियो। खेलमा पछाडि परेको ब्राजिलका लागि ३२औं मिनेटमा भिनिसियस जुनियरले बराबरी गोल फर्काएपछि पहिलो हाफ १–१ को अवस्थामा सकिएको थियो।
दोस्रो हाफमा दुवै टोलीले केही अवसर सिर्जना गरे पनि गोल गर्न नसक्दा खेल बराबरीमै टुंगियो। पाँच पटकको विश्वकप विजेता ब्राजिलले यससँगै प्रतियोगितामा विजयी सुरुआत गर्ने अवसर गुमाएको छ।
यसै समूहअन्तर्गत गएराति भएको अर्को खेलमा कतार र स्वीट्जरल्यान्डले पनि १–१ को बराबरी खेलेका छन्।
सान फ्रान्सिस्कोमा सम्पन्न खेलमा स्वीट्जरल्यान्डले १७औं मिनेटमा पेनाल्टीमार्फत अग्रता बनाएको थियो। तर इन्ज्युरी समयमा मिरो मुहेमबाट भएको आत्मघाती गोलका कारण कतारले खेल बराबरीमा ल्याउँदै महत्वपूर्ण एक अंक बटुल्न सफल भयो।
पहिलो चरणका खेलपछि समूह ‘सी’ का चारै टोलीले समान एक–एक अंक जोडेका छन्, जसले समूहको प्रतिस्पर्धा थप रोचक बनेको छ।
