काठमाडौँ । भेनेजुएलाका पूर्वराष्ट्रपति निकोलस मादुरोले आफू अमेरिकाको हिरासत केन्द्रमा रहेको देखिने दुईवटा तस्बिर सार्वजनिक गरेका छन्।
गत जनवरीमा अपहरण गरेर अमेरिका लगिएपछि हिरासतमा रहेका मादुरोले पहिलोपटक आफ्नो तस्बिर सार्वजनिक गरेका हुन्।
अमेरिकी विशेष बलले भेनेजुएलाको राजधानी काराकासबाट मादुरो र उनकी पत्नी सिलिया फ्लोरेसलाई नियन्त्रणमा लिएर अमेरिका लगेको थियो।
उनीहरूलाई न्यूयोर्कको ब्रुकलिनस्थित एक हिरासत केन्द्रमा राखिएको छ। उनीहरूमाथि लागुऔषध तस्करी र हतियार राखेको आरोपमा मुद्दा चलिरहेको छ। दुवैले ती आरोप अस्वीकार गर्दै आएका छन्।
मादुरोले सामाजिक सञ्जाल एक्स र टेलिग्राममा तस्बिर सार्वजनिक गर्दै स्पेनी भाषामा लेखेका छन्, ‘म यी तस्बिरहरू मेरा सबै नातिनातिनी, केटाकेटी तथा हामीलाई माया गर्ने सबै असल मानिसका लागि सानो उपहारका रूपमा पठाउँदैछु।’
सार्वजनिक गरिएका दुई तस्बिरमा मादुरोले खैरो ट्र्याकसुट लगाएका छन् र दुवै हातले ‘पिस’ संकेत गरिरहेका छन्।
उनलाई पक्राउ गरिएयता सार्वजनिक भएको यो पहिलो तस्बिर हो। तस्बिरमा उनी पक्राउ पर्नुअघिको तुलनामा निकै दुब्लाएको देखिन्छ।
तस्बिर आइतबार सार्वजनिक गरिए पनि त्यसमा उल्लेखित मितिअनुसार ती तस्बिर जुन २५ मा खिचिएका थिए। जुन २५ मा भेनेजुएलाको उत्तरी क्षेत्रमा ७।५ र ७।२ म्याग्निच्युडका दुई शक्तिशाली भूकम्प आएका थिए, जसमा ६ हजार ५०० भन्दा बढी मानिसको मृत्यु भएको थियो र ठूलो भौतिक क्षति भएको थियो।
