पुँजीवादलाई सलाम ठोक्ने
सडेका पतित सोचहरूबाट
अब कुनै कार्ल मार्क्सको जन्म हुँदैन…।
विश्वास बोकेर हिँडेको समाज छ
बर्बाद हुँदै गरेको अस्तित्व छ
यो अभावी अस्तित्वको
अवस्थाबाट माथि कुनै
निकोला टेस्ला जन्मिदैन…
ढुङ्गा हान्दै लखेटी सक्यौ
सभ्यताबाट…
अब लाखौं आमाहरूबाट
करोडौं नामर्दहरू जन्मिएलान्
एक आमाबाट एक बुद्ध फेरि जन्मिदैनन्।
कुवाबाट निस्कन नसकेका यी
भ्यागुता जस्ता देशबाट
आइन्स्टाइनको दिमाग लिएर
कोही जन्मँदैन।
मस्तिको कुनै आनन्द देख्नेछैन यो युगले
,,,महाबीर, नानक, कबिर, मीरा,
जस्तालाई थुक्दै हिँड्ने यो समाजमा
अब कुनै ज्ञानको ज्योति नबल्नेछ,
जन्मँदैन कुनै शान्तिको बीज।
दबाब, तनाव र सराबबाट ग्रस्त यो
समुदायको संरचनाबाट
बरु
लाखौं हिटलर जन्मनेछन्,
करोडौं मुसोलिनी,
एक-अर्कालाई मार्ने धन्दा गर्नेछन्,
तर
कतै विश्वमा उज्यालो छर्ने क्राइस्टको जन्म हुँदैन।
साम्राज्यवादको चर्को महामारीमा
साम्यवाद भाइरस छिरेपछि
ग्रन्थ बोक्ने हातमा
कम्युनिस्ट म्यानिफेस्टो हुनेछ…।
धार्मिकता माथि अधार्मिक प्रहारसँगै
धर्मको धज्जी उडाउने
धन्दाका लालसलामीहरू
आस्थाको रगत पिएर लाल-लाल हुनेछन्।
अनि
अस्तित्व बेचेर समयले
अब अर्को महाकल्प ल्याउँदैछ।
सावधान! अस्तित्वका दास हो,
अस्तित्वका अस्थिपञ्जरबाट कुनै
‘मसिह’को जन्म हुँदैन।
हे! आमा, जन्माउन सक्छौ भने
महापुरुष जन्माउ,
नत्र युगले तुह्याइदिनेछ,
बाँझो बनाइदिनेछ गर्भ।
फेरि यो समयले
कुनै सपुत नजन्माउनेछ…।
—समिन
