काठमाडौँ। ताइवानको पूर्वी तटमा बुधबार ७.४ म्याग्निच्युडको भूकम्प गएको छ । जसले टापु र यसका छिमेकी देशहरूमा सुनामीको चेतावनी जारी गरेको छ।
यूएस जियोलोजिकल सर्भेका अनुसार भूकम्पको केन्द्र ताइवानको हुआलियन सहरबाट १८ किलोमिटर (११ माइल) दक्षिणमा रहेको छ ।
भूकम्पमा परी अहिलेसम्म चार जनाको मृत्यु भएको ताइवानी अधिकारीहरूलाई उद्धृत गर्दै विभिन्न सञ्चार माध्यमहरुले जनाएका छन् । भूकम्पमा १३० भन्दा बढी गम्भीर घाइते भएको समाचारमा उल्लेख गरिएको छ । भूकम्पको कारण सयौँ घर ध्वस्त भएका छन् भने केही सडकहरु भाँसिएका छन् ।
ताइवानको पूर्वी तटीय क्षेत्र ख्वालिएन सहरदेखि करिब १८ किलोमिटर पर केन्द्रबिन्दु बनाई भूकम्प गएको बिबिसीले जनाएको छ । अमेरिकी भौगर्भिक अध्ययन निकाय यूएसजीएसका अनुसार अहिले पनि उक्त क्षेत्रमा ४ रेक्टर स्केलसम्मका पराकम्पनहरु गइरहेको छ ।
चीनको दक्षिणपूर्वी फुजिआन प्रान्तका पनि कतिपय ठाउँमा भूकम्पको धक्का महसुस भएको अन्तर्राष्ट्रिय सञ्चार माध्यमले जनाएका छन्।
ताइवानमा यसअघि सन् १९९९ को सेप्टेम्बरमा ७.६ रेक्टर स्केलको भूकम्प गएको थियो । त्यतिबेला दुई हजार चार सय नागरिकले ज्यान गुमाएका थिए ।
