। कोलम्बियामा ७.४ म्याग्निच्युडको शक्तिशाली भूकम्प जाँदा कम्तीमा १३२ जनाको मृत्यु भएको छ भने सयौं मानिस बेपत्ता भएका छन्। ५७० जना घाइते भएको स्थानीय अधिकारीहरूले जनाएका छन्।
भूकम्पका कारण काली, पेरेइरा, क्विब्दो र मानिजालेससहित पश्चिमी कोलम्बियाका विभिन्न शहरमा ठूलो क्षति पुगेको छ। कालीमा २० वटा भवन पूर्णरूपमा भत्किएका छन् भने सयौं भवनमा क्षति पुगेको छ। पेरेइरामा पनि भवन तथा विमानस्थलमा क्षति पुगेको छ।
भूकम्पको केन्द्रबिन्दु राजधानी बोगोटाबाट करिब ४०० किलोमिटर पश्चिममा रहेको चोको क्षेत्रको सान होसे डेल पालमारमा थियो। भूकम्पपछि २१ भन्दा बढी परकम्प गएका छन्। चोको क्षेत्रमा सञ्चार अवरुद्ध भएकाले क्षतिको पूर्ण विवरण अझै आउन सकेको छैन।
राष्ट्रपति अबेलार्दो दे ला एस्प्रिएल्लाले राष्ट्रिय संकटकाल घोषणा गर्दै उद्धार तथा राहतलाई सरकारको पहिलो प्राथमिकता बनाएका छन्। भग्नावशेषमा फसेकाहरूको खोजी तथा उद्धार कार्य जारी छ।
कोलम्बियन जियोलोजिकल सर्भिसका अनुसार यो २१औँ शताब्दीमा कोलम्बियामा गएको सबैभन्दा शक्तिशाली भूकम्प हो। भूकम्पको धक्का छिमेकी इक्वेडर र पानामासम्म महसुस गरिएको थियो।
भूकम्पपछि अमेरिका, मेक्सिको, चिली, इजरायल, इक्वेडर, फ्रान्सलगायतका देशले उद्धार तथा राहतमा सहयोग गर्ने प्रतिबद्धता जनाएका छन्। अमेरिकाले आपत्कालीन सहायता स्वरूप १ करोड ५५ लाख डलर सहयोग गर्ने घोषणा गरेको छ।
