भक्तपुर । वर्षौँदेखि आफ्नो थातथलोमा बसोबास गर्दै आए पनि जग्गाको कानुनी स्वामित्वको प्रमाण नपाएका भक्तपुरका ४२१ परिवारको सपना अन्ततः पूरा भएको छ। नापजाँच सम्पन्न भएको करिब चार वर्षपछि मध्यपुरथिमि नगरपालिका–८ का ४२१ परिवारले जग्गाधनी प्रमाणपुर्जा अर्थात् लालपुर्जा प्राप्त गरेका छन्।
भूमि समस्या समाधान समितिले लामो समयदेखि रोकिएको प्रक्रिया अघि बढाउँदै ४२१ थान जग्गाधनी पुर्जा वितरण गरेको हो। पुर्जा हातमा परेसँगै ‘स्ववासी’का रूपमा बसोबास गर्दै आएका परिवारले आफ्नो जग्गामाथिको कानुनी स्वामित्व पाएका छन्।
साविक निलवाराही गाउँ विकास समिति वडा नं. २, ३, ४, ५, ६ र ७ अन्तर्गत पर्ने गाउँ ब्लक (स्ववासी) जग्गाको नापजाँच आर्थिक वर्ष २०७८/७९ मै सम्पन्न भएको थियो। उक्त क्षेत्र स्थानीयस्तरमा ‘बोदे गाउँ’का रूपमा चिनिँदै आएको पुरानो नेवारी बस्ती हो।
नापजाँच सम्पन्न भए पनि जग्गा दर्ताका लागि आवश्यक प्रक्रिया पूरा गर्न स्थानीयको जनसहभागिता न्यून हुँदा पुर्जा वितरणको काम लामो समय रोकिएको थियो। आयोगबाट नापनक्सा भइसकेका जग्गाको बाँकी आवश्यक प्रक्रिया पूरा गर्दै अहिले ४२१ परिवारलाई जग्गाधनी प्रमाणपुर्जा वितरण गरिएको हो।
लामो समयदेखि लालपुर्जाको प्रतीक्षामा रहेका परिवारका लागि यो केवल कागजी प्रमाण होइन, वर्षौँदेखिको आफ्नो थातथलोमाथिको कानुनी अधिकार प्राप्त भएको महत्वपूर्ण क्षण बनेको छ।
पुर्जा प्राप्त गरेसँगै अब ती ४२१ परिवार आफ्नो जग्गाको कानुनी स्वामित्वसहित सम्पत्तिसम्बन्धी विभिन्न सरकारी तथा कानुनी प्रक्रिया सहज रूपमा अघि बढाउन सक्ने भएका छन्। चार वर्षअघि भएको नापजाँचपछि रोकिएको प्रक्रिया अघि बढेर लालपुर्जा वितरण भएपछि स्थानीयमा समेत उत्साह बढेको छ।
