काठमाडौं । जनआस्था साप्ताहिकका प्रधान सम्पादक तथा वरिष्ठ पत्रकार किशोर श्रेष्ठलाई जिल्ला प्रहरी परिसर काठमाडौंको हिरासतबाट प्रहरी वृत्त महाराजगञ्जमा सारिएको छ। प्रहरीले श्रेष्ठलाई हाल महाराजगञ्ज वृत्तको हिरासतमा राखिएको पुष्टि गरेको छ।
समाचार सामग्रीका विषयलाई लिएर एक महिलाले वैयक्तिक गोपनीयता भंग भएको आरोपमा दिएको उजुरीका आधारमा श्रेष्ठलाई २७ साउनको राति कुसुन्तीस्थित आफ्नै निवासबाट प्रहरीले पक्राउ गरेको थियो। त्यसपछि उनलाई जिल्ला प्रहरी परिसर काठमाडौंको हिरासतमा राखिएको थियो।
श्रेष्ठमाथि अनुसन्धानका लागि काठमाडौं जिल्ला अदालतले बिहीबार तीन दिनको हिरासत अनुमति दिएको थियो। यसैबीच गैरकानुनी थुनामा राखिएको दाबी गर्दै उनकी श्रीमती सरस्वती श्रेष्ठले सर्वोच्च अदालतमा बन्दीप्रत्यक्षीकरणको रिट दायर गरेकी थिइन्।
उक्त रिटमाथि सुनुवाइ गर्दै न्यायाधीश बालकृष्ण ढकालको इजलासले श्रेष्ठलाई बरामद गरिएका सामग्रीसहित सोमबार सर्वोच्च अदालतमा उपस्थित गराउन आदेश दिएको छ।
प्रहरीले श्रेष्ठको पक्राउसँगै जनआस्था साप्ताहिकको कार्यालय तथा उनको निवासमा खानतलासी गरी कम्प्युटर, ल्यापटप, मोबाइललगायत विद्युतीय सामग्रीसमेत नियन्त्रणमा लिएको छ। उनलाई वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा अनुसन्धान भइरहेको प्रहरीले जनाएको छ।
श्रेष्ठको पक्राउ र जनआस्थाको कार्यालयमा गरिएको खानतलासीको विषयमा नेपाल पत्रकार महासंघ, नेपाल मिडिया सोसाइटी, विश्व प्रेस काउन्सिललगायतका संस्थाले विरोध जनाउँदै आएका छन्। विभिन्न राजनीतिक दलहरूले समेत श्रेष्ठलाई निःशर्त रिहा गर्न माग गरेका छन्।
विश्व प्रेस काउन्सिलका वरिष्ठ उपाध्यक्षसमेत रहेका श्रेष्ठ प्रेस काउन्सिल नेपालका पूर्व अध्यक्ष तथा नेपाल पत्रकार महासंघका पूर्व महासचिव हुन्।
अब सर्वोच्च अदालतको आदेशअनुसार सोमबार श्रेष्ठलाई बरामद सामग्रीसहित अदालतमा उपस्थित गराइनेछ। त्यसपछि उनको हिरासत, पक्राउको कानुनी आधार तथा अनुसन्धानसँग सम्बन्धित विषयमा थप प्रक्रिया अघि बढ्नेछ।
