जनकपुरधाम । मधेश प्रदेशमा पछिल्ला दिनहरूमा लगातार भइरहेका हिंसात्मक घटनाले सुरक्षा अवस्थामाथि गम्भीर प्रश्न उठिरहेका बेला धनुषाको सबैला नगरपालिकास्थित एक मन्दिरमा बस्दै आएका व्यक्तिको निर्मम हत्या भएको छ। धार्मिकस्थलमै भएको यो घटनाले स्थानीयवासीलाई स्तब्ध बनाएको छ भने प्रदेशको शान्ति–सुरक्षामाथि थप चिन्ता बढाएको छ।
धनुषाको सबैला नगरपालिका–१२, रघुनाथपुर नहरचोकस्थित शिव–हनुमान मन्दिरमा विगत करिब १०–१२ वर्षदेखि बस्दै आएका बन्ठु राउत मृत अवस्थामा फेला परेका हुन्। उनी धनुषाको हँसपुर नगरपालिका निवासी करिब ५५ वर्षीय रहेको खुलेको छ। स्थानीयले उनलाई मन्दिरको पूजारीका रूपमा चिन्ने गरे पनि उनी औपचारिक रूपमा पूजारी नभई मन्दिरको रेखदेख तथा कुरुवाको रूपमा बस्दै आएको सबैला नगरपालिकाका मेयर कारीराम यादव ले स्पष्ट पारेका छन्।
मेयर यादवका अनुसार घटनास्थल अत्यन्त विभत्स अवस्थामा भेटिएको थियो। मन्दिरभित्र जताततै रगतका छिटा देखिनुका साथै मृतकले ज्यान जोगाउन अन्तिमसम्म संघर्ष गरेको संकेत देखिएको उनले बताए।
“घटना निकै दुःखद र संवेदनशील छ। अहिले नै हत्या किन र कसरी भयो भन्ने निष्कर्षमा पुग्न सकिने अवस्था छैन। प्रहरीको टोली तालिमप्राप्त कुकुरसहित घटनास्थलमा पुगेर अनुसन्धान गरिरहेको छ। अनुसन्धानपछि मात्रै घटनाको वास्तविक कारण खुल्नेछ,” मेयर यादवले बताए।
घटनापछि जिल्ला प्रहरी कार्यालय धनुषाको टोली घटनास्थलमा पुगेर प्रमाण संकलन तथा अनुसन्धान अघि बढाएको छ। यद्यपि हत्या कसले र कुन उद्देश्यले गर्यो भन्ने विषय अझै खुल्न सकेको छैन। प्रहरीले घटनालाई गम्भीर रूपमा लिएर अनुसन्धान तीव्र बनाएको जनाएको छ।
मधेशमा एकपछि अर्को हिंसात्मक घटना, सुरक्षा चुनौती थप गहिरिँदै
यो हत्या मधेश प्रदेशमा पछिल्ला केही दिनयता भइरहेका हिंसात्मक घटनाक्रमकै बीचमा भएको हो। विभिन्न जिल्लामा भएका झडप, आगजनी, साम्प्रदायिक तनाव तथा एक जनाको ज्यान जाने घटनापछि प्रदेशभर सुरक्षा सतर्कता बढाइएको छ। केही स्थानमा निषेधाज्ञा जारी गरिएको थियो भने नेपाल प्रहरी, सशस्त्र प्रहरी र आवश्यक स्थानमा नेपाली सेनासमेत परिचालन गरिएको छ।
यही संवेदनशील अवस्थाबीच गृहमन्त्री सुदन गुरुङ मधेशमै पुगेर हिंसात्मक घटनामा घाइते भएकाहरूको स्वास्थ्य अवस्था बुझ्ने, पीडित परिवारसँग भेटघाट गर्ने तथा सुरक्षा अवस्थाको प्रत्यक्ष अनुगमन गर्ने कार्यमा व्यस्त छन्। उनले स्थानीय प्रशासन र सुरक्षा निकायलाई कुनै पनि प्रकारको हिंसा तथा उत्तेजना नियन्त्रण गर्दै दोषीलाई कानुनी दायरामा ल्याउन निर्देशन दिइरहेका बेला धनुषामा धार्मिकस्थलभित्र भएको यो हत्या घटनाले प्रदेशको सुरक्षा चुनौतीलाई अझ गम्भीर बनाएको छ।
धार्मिक आस्थासँग जोडिएको स्थानमै भएको यो जघन्य घटनाले स्थानीयवासीमा त्रास फैलिएको छ। नागरिकहरूले निष्पक्ष र पारदर्शी अनुसन्धान गरी वास्तविक दोषीलाई तत्काल कानुनी दायरामा ल्याउन माग गरेका छन्। मधेशमा लगातार भइरहेका हिंसात्मक घटनाले शान्ति, सद्भाव र नागरिक सुरक्षामाथि नयाँ बहस सुरु गराएको छ।
