चितवन । कालिका नगरपालिका र भरतपुर महानगरपालिकालाई जोड्ने भोजाड सडकमा पर्याप्त सडकबत्तीको व्यवस्था नहुँदा स्थानीयवासीले दैनिक आवतजावतमा सास्ती खेप्नुपरेको छ। साँझ र रातिको समयमा सडक पूर्ण रूपमा अन्धकार हुने भएकाले दुर्घटना, आपराधिक गतिविधि तथा वन्यजन्तुको जोखिम बढेको भन्दै स्थानीयले सम्बन्धित निकायसँग तत्काल सडकबत्ती जडान गर्न माग गरेका छन्।
भोजाड सडक दुवै पालिकाका हजारौं नागरिकले दैनिक प्रयोग गर्ने महत्वपूर्ण मार्ग हो। स्थानीय बासिन्दा, विद्यार्थी, कर्मचारी, व्यवसायी तथा किसानहरू यही सडक हुँदै भरतपुर आवतजावत गर्ने गर्छन्। विशेषगरी किसानहरूले आफ्नो कृषि उत्पादन बजारसम्म पुर्याउन यही सडक प्रयोग गर्दै आएका छन्।
स्थानीयका अनुसार सडकको ठूलो भाग जंगल क्षेत्रसँग जोडिएको छ। भरतपुर महानगरसँग जोडिने मुख्य मार्ग भए पनि पर्याप्त सडकबत्ती नहुँदा रातिको समयमा यात्रा गर्न नागरिक त्रसित हुने गरेका छन्। विगतमा यस सडकमा विभिन्न गम्भीर दुर्घटना र अप्रिय घटनासमेत भएको भन्दै स्थानीयले अन्धकारका कारण जोखिम अझ बढेको बताएका छन्।
सडकमा फुटपाथको व्यवस्था नहुँदा पैदलयात्री र साइकल चालक झन् बढी जोखिममा पर्ने गरेका छन्। अहिले पनि धेरै विद्यार्थी, मजदुर र सर्वसाधारण दैनिक रूपमा साइकल प्रयोग गरेर यही सडकबाट आवतजावत गर्ने भए पनि साँघुरो सडक र अन्धकारका कारण सुरक्षित रूपमा यात्रा गर्न कठिन हुने गरेको उनीहरूको गुनासो छ।
स्थानीयवासीको भनाइमा समयमै सडकबत्ती जडान गरिए सडक दुर्घटना न्यूनीकरण हुनुका साथै रातिको समयमा वन्यजन्तुबाट हुने सम्भावित जोखिम पनि कम हुनेछ। यसले महिला, विद्यार्थी, ज्येष्ठ नागरिक तथा राति कामबाट घर फर्किने नागरिकलाई सुरक्षित वातावरण उपलब्ध गराउने विश्वास गरिएको छ।
यस विषयलाई लिएर स्थानीय युवाहरूले सामाजिक सञ्जालमा #उज्यालो_भोजाड_सडक लगायतका ह्यासट्याग प्रयोग गर्दै अभियानसमेत सुरु गरेका छन्। उनीहरूले एउटा नगरपालिका र महानगरपालिकालाई जोड्ने मुख्य सडक नै अन्धकारमा रहनु अत्यन्त लाजमर्दो विषय भएको उल्लेख गर्दै सम्बन्धित निकायको ध्यानाकर्षण गराइरहेका छन्।
समाजका अगुवाहरू पनि भरतपुर महानगरको विकासको चर्चा देश–विदेशमा भइरहेका बेला महानगरलाई कालिका नगरपालिकासँग जोड्ने महत्वपूर्ण सडकको अवस्था भने अझै अन्धकारमै रहनु विडम्बनापूर्ण भएको बताउँछन्। विकासको उदाहरण प्रस्तुत गरिने शहरसँग जोडिएको यस्तो आधारभूत पूर्वाधारको अभावले स्थानीयलाई निराश बनाएको उनीहरूको भनाइ छ।
स्थानीयले भोजाड सडक राष्ट्रिय स्वतन्त्र पार्टी (रास्वपा)का सभापति तथा चितवन क्षेत्र नम्बर–२ का प्रतिनिधिसभा सदस्य रवि लामिछानेको निर्वाचन क्षेत्रसँग समेत जोडिने भएकाले यस समस्याको समाधानमा जनप्रतिनिधिहरूले विशेष चासो दिने अपेक्षा गरेका छन्। नागरिकले जनप्रतिनिधि, भरतपुर महानगरपालिका, कालिका नगरपालिका तथा सम्बन्धित निकायबीच समन्वय गरेर यथाशीघ्र सडकबत्ती जडान गरी सुरक्षित आवतजावतको वातावरण बनाउन माग गरेका छन्।
“उज्यालो सडक विलासिता होइन, नागरिकको आधारभूत आवश्यकता हो,” भन्दै स्थानीयले ढिलाइ नगरी सडकबत्तीको व्यवस्था गर्न सम्बन्धित निकायसँग आग्रह गरेका छन्।
