काठमाडौं । चलचित्र बेहुली’ आगामी भदौ २६ गतेदेखि देशभरका सिनेमाघरमा प्रदर्शनमा आउने भएको छ। राजधानीमा आयोजित कार्यक्रममा निर्माण टिमले पोस्टर सार्वजनिक गर्दै प्रदर्शन मिति घोषणा गरेको हो।
द डिभाइन म्युजिक’ र ‘सम्मान इन्टरटेन्मेन्ट’को ब्यानरमा बनेको चलचित्रको पोस्टरले गहिरो प्रेमकथा र विद्रोही भाव प्रस्तुत गरेको छ। कार्यक्रममा अभिनेता पारस बम ठकुरी र अभिनेत्री दिव्या रायमाझी पोस्टरकै शैलीमा मञ्चमा प्रस्तुत भएका थिए। चलचित्रमा पारस र दिव्यासँगै सुशान्त कार्कीको पनि प्रमुख भूमिका रहेको छ।
सशान कँडेलको निर्देशनमा बनेको चलचित्रमा पदम तामाङ, सन्तोष बानियाँ, सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगरलगायत कलाकारको अभिनय रहेको छ।
चलचित्रमा नरेन्द्र मैनालीको छायाङ्कन, विकास दाहालको सम्पादन, रोशन श्रेष्ठको एक्सन तथा अर्जुन पोखरेलको संगीत रहेको छ। प्रताप शमशेर राणा निर्माता रहेको फिल्मका कार्यकारी निर्माता शंकर कोइराला र रमेश सिलवाल हुन्।
निर्माण पक्षका अनुसार ‘बेहुली’ काठमाडौं उपत्यकाभित्र काफिया फिल्म्स र उपत्यकाबाहिर श्री व्यंकटेश इन्टरटेन्मेन्टमार्फत प्रदर्शन गरिनेछ।
