फतुवा विजयपुर नगरपालिकाको ५५.८३ वर्ग किलोमिटर क्षेत्रफल, जनसंख्या, भौगोलिक बनावट तथा प्रशासनिक संरचनासँगै नगर गठनको ऐतिहासिक पृष्ठभूमिलाई कार्यक्रममार्फत समेटिएको थियो।
कार्यक्रममा साविक टेङ्गाहा, सन्तपुर दोस्तिया, शीतलपुर बैरगनिया, लक्ष्मीनिया र फतुवा हर्षाहा गाविसहरूलाई समेटेर २०७३ साल फागुन २७ गते गठन भएको फतुवा विजयपुर नगरपालिकाको स्थापना प्रक्रिया, नामाकरणको इतिहास तथा स्थानीय सामाजिक–सांस्कृतिक विविधतालाई विशेष प्राथमिकताका साथ प्रस्तुत गरिएको थियो।
यसैगरी कृषि क्षेत्रलाई नगरको प्रमुख आर्थिक आधारका रूपमा प्रस्तुत गर्दै धान, गहुँ, मकै, दलहन, तेलहन तथा तरकारी खेती, पशुपालन, सिँचाइ सुविधा विस्तार, कृषि आधुनिकीकरण तथा किसानमुखी कार्यक्रमहरूलाई समेटिएको थियो। कृषि उत्पादन वृद्धि, बजार पहुँच तथा कृषिमा आधारित रोजगारी सिर्जनाका प्रयासहरूबारे समेत जानकारी प्रस्तुत गरिएको थियो।
पूर्वाधार विकासअन्तर्गत सडक कालोपत्रे, ग्राभेल तथा ढल निर्माण, पुल–पुलेसा, वडा कार्यालय भवन, शैक्षिक तथा सामुदायिक भवन निर्माण, खानेपानी तथा विद्युतीकरण विस्तारलगायतका योजनाहरूलाई समावेश गरिएको थियो। यातायात पहुँच विस्तार र शहरी पूर्वाधार सुदृढीकरणका लागि नगरपालिकाले अघि बढाएका कार्यक्रमहरूलाई पनि प्राथमिकताका साथ प्रस्तुत गरिएको थियो।
स्वास्थ्य तथा शिक्षा क्षेत्रमा आधारभूत स्वास्थ्य सेवा विस्तार, स्वास्थ्य संस्थाहरूको स्तरोन्नति, खोप तथा पोषण कार्यक्रम, विद्यालयको भौतिक पूर्वाधार सुधार, गुणस्तरीय शिक्षामा पहुँच वृद्धि तथा विद्यार्थी लक्षित विभिन्न कार्यक्रमहरूलाई पनि समेटिएको थियो।
सामाजिक समावेशिता, महिला सशक्तीकरण, युवा तथा खेलकुद विकास, विपद् व्यवस्थापन, वातावरण संरक्षण तथा धार्मिक–सांस्कृतिक सम्पदाको संरक्षण एवं प्रवर्द्धनका लागि नगरपालिकाले सञ्चालन गरेका विभिन्न कार्यक्रम तथा गतिविधिहरूलाई दृश्य तथा विवरणसहित प्रस्तुत गरिएको थियो। साथै, सुशासन, पारदर्शिता र नागरिकमैत्री सेवा प्रवाहमार्फत समृद्ध र व्यवस्थित नगर निर्माणतर्फ फतुवा विजयपुर नगरपालिका निरन्तर अग्रसर रहेको विषयलाई समेत कार्यक्रममा विशेष रूपमा उजागर गरिएको थियो।
