काठमाडौँ । दक्षिण सुडानमा पछिल्ला केही हप्तादेखि जारी आक्रमणका कारण करिब ६० हजार कुपोषित बालबालिकाले आवश्यक खाद्य तथा पोषण सामग्री पाउन नसकेको संयुक्त राष्ट्रसङ्घले बताएको छ।
विगतदेखि नै अशान्ति र राजनीतिक अस्थिरताबाट पीडित रहेको यो राष्ट्रको माथिल्लो नाइल प्रदेशमा राष्ट्रपति साल्वा किइर र उपराष्ट्रपति रिएक माचार समर्थक सुरक्षाकर्मीहरूबीचको पछिल्लो झडपले अवस्था थप बिग्रिएको छ ।
संयुक्त राष्ट्रसङ्घीय खाद्य कार्यक्रम र बालबालिका कोषले संयुक्त रूपमा जारी गरेको विज्ञप्तिमा, देशको उत्तरतर्फको क्षेत्रमा झन्डै एक महिनादेखि राहत सामग्री नपुगेको जनाइएको छ । यो क्षेत्र विगत एक वर्षभित्र तीन लाखभन्दा बढी बालबालिकामा मध्यमदेखि गम्भीर कुपोषण देखिएको क्षेत्र हो । खाद्य कार्यक्रमकी दक्षिण सुडान प्रतिनिधि मेरी एलेन म्याकग्रोर्टीले भने,“कुपोषणको संक्रमणमा परेका बालबालिकाका लागि हरेक दिन अमूल्य हुन्छ ।”
युद्धको चर्को अवस्थाका कारण करिब दुई हजार पोषण सामग्रीका बक्सहरू लुटिएको जानकारी दिइएको छ । बालबालिका कोषकी प्रतिनिधि ओबिया अचिएङले भने,“नदी मार्ग बन्द, लुटपाट र झडपका कारण राहत आपूर्ति पुरै अवरुद्ध भएको छ । यदि अवस्था यस्तै रह्यो भने अधिकांश जिल्लामा सामग्री सकिनेछ, जसको गम्भीर असर बालबालिकामा पर्न सक्छ ।”
दक्षिण सुडानले सन् २०११ मा सुडानबाट स्वतन्त्रता पाएपछि लगातार अस्थिरता झेल्दै आएको छ । किइर र माचारबीच पाँच वर्ष लामो गृहयुद्ध भएको थियो, जसमा करिब चार लाख मानिसको ज्यान गएको थियो । सन् २०१८ मा भएको शक्ति बाँडफाँडको सहमति पछिल्ला महिनामा लगभग निष्क्रिय भएको बताइएको छ ।
