काठमाण्डौ । दक्षिण कोरिया जाने नेपाली कामदारलाई अवैध रुपमा प्रिपेड सिमकार्ड वितरणका नाममा ठगी भइरहेको पाइएको छ । ललिपुरमा रहेको ईपीएस कोरिया शाखाको कार्यालय परिसरमा दक्षिण कोरिया जाने नेपाली कामदारलाई अवैध रुपमा प्रिपेड सिमकार्ड वितरण भइरहेको पाइएको हो ।
सिमकार्ड निःशुल्क रुपमा वितरण भइरहेको भए पनि कोरिया घुम्न गएका विदेशीहरूले केही दिन प्रयोग गरेर छाडेको सिमकार्ड रहेको पाइएको छ । सिमकार्ड निःशुल्क वितरण गर्ने भनिए पनि रिचार्ज गर्ने नाममा प्रतिव्यक्ति ३ हजार रुपैयाँसम्म उठाउने गरेको पाइएको ईपीएस कोरिया शाखाका निर्देशक पुष्पराज कटुवालले बताउनु भयो ।
उहाँले अवैधरुपमा प्रिपेड सिमकार्ड वितरण भइरहेको पाइएपछि तत्काल यो काम रोक्न नेपाल प्रहरी, वाणिज्य आपूर्ति तथा उपभोक्ता संरक्षण विभागलगायत सम्बन्धित निकायलाई जानकारी दिएको बताउनु भयो ।
ईपीएस कोरिया शाखाका निर्देशक कटुवालले कार्यालय परिसर वरपर बिमा, फोटोकपी, प्रिन्टिङ्गलगायतका काममा पनि बजार मूल्य भन्दा चर्को शुल्क लिइ ठगी गर्ने गरेको पनि बताउनु भयो । उहाँले यस्ता ठगी कार्य तत्काल रोक्न सम्बन्धित निकायलाई अनुरोध गरिएको बताउनु भयो ।
