काठमाडौँ । नेपाल चिकित्सक संघ र एशोसिएशन अफ प्राइभेट हेल्थ इन्स्टिच्युसन नेपाल (अफिन)ले आजदेखि लागू हुनेगरी चिकित्सकको परामर्श सेवा शुल्क बढाएको छ । संघका महासचिव डा. सञ्जीव तिवारीले आजदेखि लागू हुनेगरी चिकित्सकको परामर्श शुल्क पहिलेको तुलनामा १४ प्रतिशत बढाइएको जानकारी दिए ।
संघले चिकित्सको परामर्श शुल्क दुई वर्षपछि बढाएको हो । स्वास्थ्य तथा जनसङ्ख्या मन्त्रालयका तर्फबाट शुल्क पुनरावलोकन तथा निर्धारण नहुञ्जेलसम्मका लागि बहिरङ्ग सेवा शुल्क (ओपिडी) शुल्क बढाइएको हो । सरोकारवाला निकायको परामर्शका आधारमा शुल्क तोक्न सक्ने अख्तियारीलाई मुख्य आधार बनाइ नेपाल राष्ट्र बैंकको मुद्रास्फीति तथा शुल्क परामर्श समितिको सिफारिसका आधारमा शुल्क बढाइएको उनले बताए ।
महासचिव तिवारीले चिकित्सकको नयाँ परामर्श शुल्क ४२० देखि ९४० सम्म तोकिएको बताए । नयाँ शुल्कअनुसार पाँच वर्षसम्म अनुभव भएका एमबीबीए तथा बीडीएस तहका चिकित्सकको शुल्क ४२० र पाँच वर्षभन्दामाथि अनुभव भएकाको ५१५ तोकिएको छ । यस्तै अब पाँच वर्षसम्म अनुभव भएका डिप्लोमा तहका चिकित्सकको ५९० र त्योभन्दा बढी छ भने ६७० तथा पाँच वर्षसम्मको अनुभव भएका एमडी, एमएस, एमडीएस तहका चिकित्सकले ७५० र पाँच वर्षभन्दा बढी अनुभव भएकाले ८०० परामर्श शुल्क लिन पाउने गरी तोकिएको छ ।
यस्तै पाँच वर्षसम्मको अनुभव भएका डीएम/एमसीएच तहका चिकित्सकको ८८० तथा पाँच वर्षभन्दा माथि अनुभव भएका एमडी/एमसीएच तहका चिकित्सकको ९४० र १० वर्षभन्दा माथि अनुभव भएका एमडी/एमएस/एमडीएसका चिकित्सकको ९४० शुल्क निर्धारण गरिएको छ ।
