काठमाडौ । अमेरिकामा रहेकाे रुसी सम्पत्ति युक्रेन पठाउन थालिएको छ । रुसले युक्रेनमा आक्रमण गरेर विध्वंश मच्चाएपछि अमेरिकाले युक्रेन पुनर्निमाण र आवश्यक सामग्री खरिद गर्नका लागि रुसी सम्पत्ति युक्रेनमा औपचारिक रुपमै पठाउन थालेको हो । बुधबार अमेरिकाका महान्यायाधिवक्ता मेरिक गारल्यान्डले रुसी धनाढ्य कोन्स्टान्टिन मालोफियभको अमेरिकामा रहेको सम्पत्तिको केही हिस्सा युक्रेन पठाउने निर्णयमा हस्ताक्षर गरिदिएका छन् ।
यसको अर्थ अब अमेरिकामा रहेका रुसी व्यापारी, रुसी सरकारका लगानीहरू सबै युक्रेन पठाइनेछन् । सन् २०२२ को फेब्रुअरी २४ यता रुसले युक्रेनमा आक्रमण थालेपछि युक्रेनका अनगिन्ती भवन तथा पूर्वाधारहरू ध्वस्त भएका छन् । युक्रेनले कति आर्थिक क्षति व्यहोर्यो भनेर अनुमान गरिने अवस्था छैन ।
रुसले युक्रेनमा आक्रमण गरेपछि नै अमेरिकाले आफ्नो देशमा रहेको रुसी सम्पत्ति रोक्का गरिदिएको थियो । अमेरिकाले आफ्ना साझेदार राष्ट्रलाई पनि रुसको सम्पत्ति फ्रिज गर्न आग्रह गरेको थियो । यसबीचमा रुसले विध्वंश पारेको युक्रेनमा रुसकै खोसिएको सम्पत्ति युक्रेन पुनर्निर्माणसँगै युक्रेनी जनताको आवश्यकतामा खर्च हुने भएको हो ।
अमेरिकी महान्यायाधिवक्ता गारल्यान्ड यस विषयमा भन्छन्, ‘हाम्रो यस कार्यले युक्रेनको पुनर्निर्माणका लागि जफत गरेको रूसी कोषको पहिलो स्थानान्तरणलाई प्रतिनिधित्व गर्दछ । यो काम अन्तिम हुनेछैन, हामी रुसी सम्पत्ति युक्रेन पठाइरहनेछौं ।’
रुसी धनाढ्यहरूको ६० अर्ब अमेरिकी डलर बराबरकाे सम्पत्ति अमेरिका र उसका सहयोगी राष्ट्रहरूमा फ्रिज छ । रुसी धनाढ्यहरूले रुसका राष्ट्रपति भ्लादमिर पुटिनलाई युद्ध रोक्न दबाब दिनुपर्ने अमेरिकी माग छ ।
