नेपाल वित्तीय संस्था कर्मचारी संघ (एफआईईयूएन)ले नेपाल एसबीआई बैंकमा कर्मचारीमाथि मानसिक उत्पीडन, प्रतिशोधपूर्ण सरुवा तथा ट्रेड युनियन अधिकारमाथि हस्तक्षेप भएको भन्दै गम्भीर ध्यानाकर्षण जनाएको छ। संघले घटनाको स्वतन्त्र, निष्पक्ष र पारदर्शी छानबिन गर्न तथा उजुरीकर्ता, पीडित कर्मचारी र ट्रेड युनियन पदाधिकारीमाथि गरिएको भनिएको सरुवासहितका निर्णय पुनरावलोकन गर्न माग गरेको छ।
एफआईईयूएनका अनुसार बैंकभित्रको आन्तरिक छानबिन प्रक्रिया निष्पक्ष निष्कर्षमा पुग्नुको सट्टा उजुरीसँग सम्बन्धित कर्मचारीमाथि मानसिक दबाब र प्रतिशोधपूर्ण व्यवहार भएको आरोप उठेको छ। यस्तो कार्य श्रमिक अधिकार र संस्थागत सुशासनविपरीत भएको संघको भनाइ छ।
संघले कम्प्लेन्ट रिड्रेसल कमिटीको प्रतिवेदन सार्वजनिक गर्न, अनुसन्धान प्रक्रिया पारदर्शी बनाउन तथा ट्रेड युनियन अधिकार, अभिव्यक्ति स्वतन्त्रता र सुरक्षित कार्यस्थल सुनिश्चित गर्न बैंक व्यवस्थापनसँग माग गरेको छ। साथै, नेपाल राष्ट्र बैंकसहित नियामक निकायलाई पनि वित्तीय क्षेत्रमा श्रमिक अधिकार र सुशासन कार्यान्वयनका लागि आवश्यक पहल गर्न आग्रह गरेको छ।
