चितवन । चितवनको कालिका नगरपालिकामा चालु आर्थिक वर्षमा २९ वटा आयोजना ठेक्का सम्झौता भएको थियो । २९ मध्ये आर्थिक वर्ष अर्थात् २०८२/०८३ सालभित्र सम्पन्न हुनेगरि २५ वटा आयोजनाको ठेक्का भएको थियो ।
तीमध्ये सडक निर्माणको काम ९ वटा रहेका थिए । असार मसान्तसम्म सकिनुपर्ने गरि सम्झौता गरिएको ९ वटै सडक निर्माण आयोजनाको काम रोकिएको कारण यो वर्षको सम्झौता अनुसार निर्माण सम्पन्न नहुने भएको छ ।
कालिका नगरपालिकाका अनुसार सडक कालोपत्रे निर्माणको लागि ठेक्का पाएका ठेकेदारहरुले लामो समयदेखि बिटुमिन नपाएपछि सडकको बेश निर्माण कार्य सकेपछि काम रोकिएर बसेका छन् ।
नगरपालिकाका प्रमुख प्रशासकीय अधिकृत देवराज चौलागाइका अनुसार सडकको बेस सम्पन्न गर्ने काम सकिएपछि ५० देखि ५५ प्रतिशत काम सम्पन्न हुन्छ । त्यसपछि सडकको अन्तिम कालोपत्रे गर्नेसम्मको काम गर्दा आधा काम बाँकी हुन्छ ।
तर, ठेकेदारले सडक कालोपत्रे गर्नको लागि चाहिने बिटुमिन अर्थात् अलकत्रा नै किन्न पाएको छैन । चौलागाइ भन्छन्, ‘हामीसँग आएर पैसा हामी दिन्छौँ बिटुमिन किनिदिनुस् भन्नुहुन्छ, बजारमा बिटुमिन पाइँदैन त्यसैले हाम्रो पालिकाको सडक निर्माणको काम पुरा हुन सकेको छैन ।’
उनका अनुसार कालिका नगरपालिकाको वडा नम्बर ८ मा पर्ने चपागौडीदेखि बुङखोला हुँदै सेरबासस सडक स्तरोन्नती, खोलेसिमल कमलचोक क्लबचोक जुटपानीबजार हुँदै शक्तिखोर सडक स्तरोन्नती, कालिका ८ र ९ का दुई वटा एकीकृत सडक ठेक्का कालिका २ को एकीकृत ठेकक, कालिका ३ को ४ वटा योजना एकीकृत ठेक्का लगायतका सडक निर्माण, मर्मत तथा स्तरोन्नती रोकिएका हुन् ।
बिटुमिन कालो, बाक्लो र टाँसिने तरल पदार्थ हो । बोलीचालीको भाषामा बिटुमिनलाई अलकत्रा भनिन्छ । पेट्रोलियम पदार्थको प्रशोधनका क्रममा बिटुमिन निकालिन्छ । यो सडक पिचको लागि प्रयोग हुने गर्दछ । इरान अमेरिका युद्धको कारण अहिले नेपाली बजारमा बिटुमिनको अभाव छ । सडक निर्माणका लागि यो पदार्थ नभइ हुँदैन । बिटुमिनसँग गिटी र बालुवा मिलाएर सडक पिचको काम गर्नुपर्ने भएपनि अलकत्रा नपाएपछि अहिले यहाँको सडक निर्माणमा बाधा परेको हो ।
कालिका नगरपालिकाका नगरप्रमुख विनोद रेग्मी अमेरिका इरानाको युद्धका कारण नेपाली बजारमा बिटुमिन नै नपाउँदा काम रोकिएको बताउँछन् । उनले केही ठेकेदारलाई काम सम्पन्न नगरेका कारण नगरपालिकाले कारबाही गरेर जरिवाना समेत लिएको बताउँदै भने, बजारमा अलकत्रा नै नपाइएपछि हामीले पनि केही गर्न सक्ने अवस्था आएन ।
