काठमाडौं । नेपालका वाणिज्य बैंकहरूले चालु आर्थिक वर्ष २०८२/८३ को पहिलो ११ महिनामै कर्मचारीको तलबभत्तामा ५५ अर्ब रुपैयाँभन्दा बढी खर्च गरेका छन्। नेपाल राष्ट्र बैंकको तथ्यांकअनुसार २० वटा वाणिज्य बैंकले जेठ मसान्तसम्म कर्मचारीको तलब, भत्ता तथा सेवा–सुविधामा ५५ अर्ब १३ करोड १६ लाख रुपैयाँ खर्च गरेका हुन्।
यो रकम अघिल्लो आर्थिक वर्षको सोही अवधिको तुलनामा ३.७६ प्रतिशतले बढी हो। गत आर्थिक वर्ष २०८१/८२ को जेठसम्म बैंकहरूले कर्मचारी तलबभत्तामा ५३ अर्ब १३ करोड ३१ लाख रुपैयाँ खर्च गरेका थिए। यसरी एक वर्षको अवधिमा बैंकहरूको कर्मचारी खर्च करिब २ अर्ब रुपैयाँले बढेको देखिएको छ।
तथ्यांकअनुसार राष्ट्रिय वाणिज्य बैंक कर्मचारी तलबभत्तामा सबैभन्दा बढी खर्च गर्ने बैंक बनेको छ। बैंकको ठूलो शाखा सञ्जाल, कर्मचारी संख्या र सरकारी बैंकको संरचनाका कारण यसको खर्च अन्य बैंकभन्दा उच्च रहेको देखिन्छ।
यता, खर्च वृद्धिदरका आधारमा भने सिटिजन्स बैंक सबैभन्दा अगाडि देखिएको छ। अघिल्लो वर्षको तुलनामा यस बैंकले कर्मचारी तलबभत्तामा सबैभन्दा धेरै वृद्धि गरेको राष्ट्र बैंकको तथ्यांकले देखाएको छ।
समीक्षा अवधिमा २० मध्ये १५ वटा बैंकको कर्मचारी खर्च बढेको छ भने ५ वटा बैंकले खर्च घटाएका छन्। यसले बैंकिङ क्षेत्रको कर्मचारी व्यवस्थापन, सेवा–सुविधा तथा पारिश्रमिक संरचनामा फरक–फरक रणनीति अपनाइएको संकेत गर्छ।
अर्कोतर्फ, स्ट्यान्डर्ड चार्टर्ड बैंक कर्मचारी तलबभत्तामा सबैभन्दा कम खर्च गर्ने बैंक बनेको छ। बैंकले समीक्षा अवधिमा ९६ करोड १४ लाख रुपैयाँ खर्च गरेको छ, जुन अघिल्लो वर्षको सोही अवधिको ९६ करोड २० लाख रुपैयाँ भन्दा सामान्य रूपमा कम हो।
बैंकिङ क्षेत्रमा डिजिटल प्रविधिको विस्तार, शाखा व्यवस्थापन, दक्ष जनशक्ति प्रतिस्पर्धा तथा पारिश्रमिक समायोजनका कारण कर्मचारी खर्च निरन्तर बढ्दै गएको विश्लेषण गरिएको छ। यद्यपि केही बैंकले लागत नियन्त्रण रणनीति अपनाउँदा कर्मचारी खर्चमा कमी ल्याउन सफल भएको तथ्यांकले देखाएको छ।
