काठमाडौं । नेपाल आयल निगमले उपभोक्ताको सहजतालाई ध्यानमा राख्दै बुधबारदेखि पुनः १४.२ केजी क्षमताको पूर्ण एलपी ग्यास सिलिन्डर बिक्री वितरण गर्ने निर्णय गरेको छ। यससँगै केही महिनादेखि लागू गरिएको ७.१ केजी (आधा सिलिन्डर) ग्यास वितरण व्यवस्था क्रमशः सीमित हुँदै जाने भएको छ।
निगमले जारी गरेको सूचनाअनुसार अब देशभरका ग्यास उद्योग र आधिकारिक विक्रेतामार्फत १४.२ केजी ग्यास सिलिन्डर २ हजार ६० रुपैयाँ कायम मूल्यमा बिक्री वितरण गरिनेछ। यसअघि निगमले गत २९ फागुनदेखि उपभोक्तालाई सानो क्षमताको ७.१ केजी ग्यास सिलिन्डर उपलब्ध गराउँदै आएको थियो।
निगमका अनुसार ७.१ केजी ग्यास सिलिन्डर पूर्ण रूपमा बजारमा प्रतिस्थापन भइसकेको अवस्था नरहेकाले हाललाई १४.२ केजी र ७.१ केजी दुवै प्रकारका सिलिन्डर समानान्तर रूपमा बिक्री वितरण गरिनेछ। सानो सिलिन्डर प्रयोग गरिरहेका उपभोक्ताले पनि तत्काल समस्या नपर्ने गरी आवश्यक व्यवस्थापन गरिएको निगमले जनाएको छ।
निगमले ग्यास उद्योग, विक्रेता तथा उपभोक्तालाई नयाँ व्यवस्था अनुसार कारोबार गर्न आग्रह गर्दै बजारमा ग्यास आपूर्ति नियमित र सहज बनाइने जनाएको छ। निगमका अनुसार उपभोक्तालाई सहज सेवा उपलब्ध गराउने तथा ग्यास वितरण प्रणालीलाई व्यवस्थित बनाउने उद्देश्यले यो निर्णय लागू गरिएको हो।
यस निर्णयसँगै अब अधिकांश उपभोक्ताले पहिलेझैं १४.२ केजी क्षमताको पूर्ण ग्यास सिलिन्डर सहज रूपमा खरिद गर्न सक्नेछन् भने ७.१ केजी सिलिन्डर पूर्ण रूपमा प्रतिस्थापन नहुन्जेल दुवै प्रणाली कायम रहनेछ।
