काठमाडौं। अर्जेन्टिनाविरुद्ध २–० को अग्रता जोगाउन नसक्दै अन्तिम–१६ बाट बाहिरिएपछि इजिप्टका मुख्य प्रशिक्षक होसाम हसनले रेफ्रीको निर्णयप्रति तीव्र असन्तुष्टि जनाएका छन्। उनले आफू अब विश्वकपका बाँकी कुनै पनि खेल नहेर्ने बताएका छन्।
इजिप्ट निर्धारित समय सकिन ११ मिनेट बाँकी रहँदा २–० ले अगाडि थियो। तर त्यसपछि अर्जेन्टिनाले लगातार तीन गोल गर्दै ३–२ को अविश्वसनीय जित निकाल्यो र क्वाटरफाइनलमा स्थान बनायो।
खेलपछि पत्रकार सम्मेलनमा हसनले आफ्नो टोली अर्जेन्टिनाभन्दा उत्कृष्ट खेलेको दाबी गर्दै रेफ्रीका निर्णयले नतिजा प्रभावित भएको आरोप लगाए।
‘म अब घर फर्किन्छु र विश्वकपका बाँकी कुनै पनि खेल हेर्दिनँ।’ उनले थपे, आज हामीसँग न्याय भएन। हामीले पेनाल्टी पाउनुपर्थ्यो। हाम्रो एउटा गोल रद्द गरियो, तर किन रद्द गरियो भन्ने अझै बुझ्न सकेको छैन।’
भीएआर निर्णयप्रति असन्तुष्टि
इजिप्टले २–० को अग्रता बनाएको गोल भिडियो असिस्टेन्ट रेफ्री (भीएआर)को समीक्षा पछि रद्द गरिएको थियो।
त्यसबाहेक इन्जुरी समयमा पेनाल्टी क्षेत्रमा भएको ट्याकलको पनि समीक्षा नगरिएको भन्दै इजिप्टले आपत्ति जनाएको थियो।
हसनले भने, ‘यो नतिजाप्रति म विश्वस्त छैन। खेल जसरी अघि बढ्यो, त्यसप्रति पनि म सन्तुष्ट छैन। सुन्दर शब्द प्रयोग गरेर ‘दुर्भाग्य’ भन्न चाहन्नँ। आज हामीमाथि अन्याय भयो।’
हसनले फ्रान्सका रेफ्री फ्रान्स्वा लेतेक्सिएरको नियुक्तिप्रति पनि सुरुदेखि नै आपत्ति जनाएको खुलासा गरे। उनले भने, ‘हामी साविक विश्वविजेताभन्दा राम्रो खेल्यौं। लगभग सबै पक्षमा हामी उत्कृष्ट थियौँ। तर मैदानभित्रका केही निर्णय र खेलअघि भएका बाह्य कारणहरूले नतिजा प्रभावित भयो।’
हसनले एटलान्टामा दिउँसो १२ बजे खेल राखिएको विषयमा पनि असन्तुष्टि व्यक्त गरे।
उनले भने, ‘जसले यस्तो समयमा खेल तालिका बनाएको हो, उसले कहिल्यै फुटबल खेलेको जस्तो लाग्दैन। फुटबल खेल १२ बजे राखिँदैन। त्यो बेला त हिँडडुल गर्ने वा खाना खाने समय हो, फुटबल खेल्ने होइन।’ उनले थपे ‘खेलाडीले बिहान साढे सात बजे खाना खाएर दिउँसो खेल्नुपर्ने हो? यो कसैलाई चलाख बन्न खोजेको जस्तो लाग्छ।’
उनले प्रतियोगिताको व्यवस्थापनमाथि पनि प्रश्न उठाउँदै भने, ‘मैदानभित्र र बाहिर धेरै कुरा प्रश्न उठाउने खालका थिए। सबैभन्दा ठूलो कुरा विश्वसनीयताको अभाव देखियो।’
अन्त्यमा उनले आफ्ना खेलाडीहरूको प्रशंसा गर्दै भने, ‘म आफ्ना खेलाडीहरूप्रति गर्व गर्छु। तर उनीहरूले पाउनुपर्ने नतिजा पाएनन्।’
