मेक्सिको सिटी । इंग्ल्याण्डले एस्टेका रङ्गशालामा घरेलु टोली मेक्सिकोलाई ३–२ ले पराजित गर्दै विश्वकपको क्वार्टरफाइनलमा स्थान बनाएको छ।
आँधीका कारण एक घण्टा ढिलो सुरु भएको खेलमा जुड बेलिङ्घमले पहिलो हाफमा ९८ सेकेन्डको अन्तरालमा दुई गोल गर्दै इंग्ल्याण्डलाई अग्रता दिलाएका थिए। मेक्सिकोका जुलियन क्विनोनेसले पहिलो हाफमै एक गोल फर्काए।
दोस्रो हाफमा जारेल क्वान्सा रातो कार्ड पाएपछि इंग्ल्याण्ड १० खेलाडीमा सीमित भए पनि एन्थोनी गोर्डनमाथि भएको फाउलबाट प्राप्त पेनाल्टीमा ह्यारी केनले गोल गर्दै टोलीलाई ३–१ को अग्रता दिलाए। त्यसपछि मेक्सिकोले पनि पेनाल्टीमार्फत राहुल जिमेनेजको गोलबाट अन्तर घटाए।
अन्तिम समयमा प्रशिक्षक थोमस टुकलले पाँच डिफेन्डरको रणनीति अपनाएपछि इंग्ल्याण्डले थपिएको ११ मिनेटसम्म दबाब झेलेर ३–२ को महत्वपूर्ण जित सुरक्षित गर्यो। अब इंग्ल्याण्डले क्वार्टरफाइनलमा नर्वेको सामना गर्नेछ।
