काठमाडौं । नेपालको मानचित्रमा पोखरा एउटा यस्तो नाम हो, जसले मानसपटलमा ठोकिनेबित्तिकै शान्त ताल, सेता हिमाल र हरियालीको एउटा जीवन्त तस्विर कोरिदिन्छ । नेपालका अनगिन्ती पर्यटकीय गन्तव्यहरूमध्ये पोखरा सधैं विशेष र पहिलो रोजाइमा पर्छ । यहाँको हावापानीमा एउटा छुट्टै मिठास छ, जसले मनको अशान्तिलाई शान्त पार्छ र जीवनलाई नयाँ ऊर्जाले भरिदिन्छ ।
भर्खरै वैवाहिक बन्धनमा बाँधिएर जीवनको नयाँ अध्याय सुरु गरेपछि, आफ्नो जीवनसाथीसँग पोखराको आँगनमा पाइला टेक्दाको अनुभूति शब्दमा वर्णन गर्नै नसकिने खालको रह्यो । नयाँ सम्बन्धको सुरुआतमा पोखराको शान्त वातावरण र हिमालको सामीप्यले हाम्रो यात्रालाई एउटा सुन्दर उत्सव जस्तै बनाइदियो ।
हाम्रो यात्राको सबैभन्दा यादगार क्षण पुम्दीकोटको दर्शन रह्यो । किनकी बैबाहिक बन्धनमा बाँधीएको केहिदिनमै हाम्रो प्रेमको उडान पुम्दीकोटको भ्रमण गर्दै सुरु हुन पुग्यो । पोखरा उपत्यकाको शिरमा अवस्थित पुम्दीकोट अहिले केवल धार्मिक गन्तव्य मात्र रहेनछ, यो त आध्यात्मिक र प्राकृतिक सौन्दर्यको अनुपम संगम बनेको रहेछ । त्यहाँ स्थापित भगवान शिवको ५१ फिट अग्लो विशाल मूर्ति देख्दा श्रद्धाले शिर आफैं झुक्दो रहेछ । करिब २२ रोपनीमा फैलिएको यो धाममा १०८ शिवलिङ्ग, डमरु र कलश जस्ता धार्मिक संरचनाहरूले एउटा दिव्य वातावरण सिर्जना गरेका छन् ।
आफ्नो श्रीमानको हात समातेर मन्दिरका खुड्किलाहरू चढ्दै गर्दा र विशाल महादेवको मूर्ति अगाडि उभिँदा, हामीले आफ्नो नयाँ जीवनको सुखद भविष्यका लागि मागेको आशिर्वादले मनमा एउटा बेग्लै शान्ति र सकारात्मक ऊर्जा सञ्चार ग¥यो । पुम्दीकोटको उचाइबाट देखिने दृश्य झनै लोभलाग्दो छ । तल निलो फेवाताल, वरिपरि हरियालीले घेरिएको पोखरा सहर र टाढा चाँदी झैं टल्किएका माछापुच्छ्रे र अन्नपूर्ण हिमशृङ्खलाहरू । सूर्योदयको पहिलो किरणले ती हिमाललाई छुँदा देखिने स्वर्णिम दृश्यले हाम्रो फोटो र भिडियो सुटिङलाई मात्र होइन, हाम्रो सम्झनालाई पनि सुनौलो बनाइदियो ।
पोखरा पुगेपछि फेवातालको किनारमा नटहल्लिने त कुरै भएन । फेवातालको लहरसँगै डुङ्गामा सयर गर्दा र तालको बीचमा रहेको प्रसिद्ध तालबाराही मन्दिरको दर्शन गर्दाको क्षण निकै आध्यात्मिक र रोमान्टिक रह्यो । तालको कञ्चन पानीमा हिमालको प्रतिबिम्ब देख्दा लाग्थ्यो, प्रकृतिले हामीलाई स्वागत गरिरहेको छ । विशेषगरी लेकसाइडको चहलपहल, जहाँ नेपालीभन्दा विदेशी पर्यटकहरूको बाक्लो उपस्थिति देखिन्छ, त्यसले पोखरालाई एउटा अन्तर्राष्ट्रिय सहरको आभास दिलाउँछ । साँझपख लेकसाइडका सडकमा आफ्नो जीवनसाथीसँग हातमा हात मिलाएर हिँड्दाको खुसी र त्यहाँको आधुनिक पर्यटकीय गतिविधिले यात्रालाई थप रोचक बनायो ।
त्यस्तै, सराङकोटको डाँडाबाट देखिने सूर्योदय र प्याराग्लाइडिङको रोमाञ्चक दृश्यले पोखराको आकर्षणलाई अर्को उचाइमा पु¥याएको छ । साहसिक पर्यटन र प्राकृतिक शान्ति खोज्नेहरूका लागि यो ठाउँ स्वर्ग नै हो । पोखराको यो फेरिँदो रूपले स्थानीय व्यापार र अर्थतन्त्रमा पनि ठूलो टेवा पु¥याएको देख्न सकिन्छ । होटल, रेष्टुरेन्ट, यातायातदेखि हस्तकलाका सामग्रीसम्मको व्यापार फस्टाउँदा स्थानीय बासिन्दाहरूले रोजगारी र आयआर्जनको राम्रो अवसर पाएका छन्, जुन देशको विकासका लागि सकारात्मक पक्ष हो ।
समग्रमा, पोखरा घुम्नका लागि मात्र होइन, मनलाई शुद्ध पार्न र नयाँ सपनाहरू बुन्नका लागि पनि एक उपयुक्त थलो हो । यहाँको स्वच्छ हावा, हिमालको मुस्कान र मानिसहरूको आतिथ्यताले जो कोहीलाई मोहित बनाउँछ । भर्खरै वैवाहिक जीवनमा बाँधिएका हामी जस्ता जोडीहरूका लागि त यो सहर सम्बन्धलाई अझ प्रगाढ बनाउने एउटा सुन्दर माध्यम बन्यो ।
पुम्दीकोटको विशाल महादेवको सामिप्यदेखि फेवातालको शान्त लहरसम्मको यो यात्राले मेरो जीवनमा सधैं एउटा विशेष स्थान राख्नेछ । यदि तपाईं पनि प्रकृति, धर्म र मनोरञ्जनको त्रिवेणीमा हराउन चाहनुहुन्छ भने, पोखरा तपाईंलाई पर्खिरहेको छ । यहाँको प्रत्येक दृश्यले जीवनलाई थप सुन्दर र अर्थपूर्ण बनाइदिनेछ ।
