सिरहा । आर्थिक अभावका कारण उपचार गराउन नसकेर दृष्टि गुमाइरहेका विपन्न नागरिकहरूका लागि सिरहाको लहान नगरपालिकाले निःशुल्क आँखा उपचार महाअभियान सञ्चालन गरेको छ । सगरमाथा चौधरी आँखा अस्पतालसँगको प्राविधिक सहकार्यमा सञ्चालित यस अभियानले वर्षौँदेखि अन्धकारमा बाँचिरहेका सयौँ नगरवासीको जीवनमा उज्यालो फर्काएको छ ।
वैशाख १२ गते लहान नगरपालिका–१७ मा सञ्चालित निःशुल्क आँखा जाँच शिविरबाट मोतियाविन्दु पहिचान भएका ४७ जना बिरामीको सफल शल्यक्रिया गरिएको छ । प्रतिव्यक्ति करिब ९ हजार रुपैयाँ लाग्ने शल्यक्रिया र औषधिको सम्पूर्ण खर्च नगरपालिकाले नै व्यहोरेको छ ।
निःशुल्क उपचार पाउनेहरूमा सोही वडाका ६० वर्षीय हरि सदा र उनकी ५८ वर्षीया श्रीमती सुकुमरिया सदा तथा ७० वर्षीय हिरा चौधरी र उनकी श्रीमती निमानी चौधरी पनि छन् । झन्डै दुई वर्षदेखि दृष्टि कमजोर भएर अरुकै सहारामा बाँचिरहेका उनीहरू निःशुल्क उपचार पाएपछि हर्षित छन् ।
अस्पतालको शैयामा रहेका बिरामीहरूलाई स्वास्थ्य लाभको कामना गर्न पुगेका नगरप्रमुख महेशप्रसाद चौधरीसमक्ष खुसी साट्दै ७० वर्षीय हिरा चौधरीले भने, ‘सरकारले यसरी घरमै आएर आँखा जचाइदिन्छ र अस्पताल ल्याएर निःशुल्क अप्रेसन गरिदिन्छ भन्ने सोचेकै थिइनँ । अब फेरि संसार देख्न पाउने भएँ, सबै दुःख बिर्सिँदै जानेछु ।’
कोही पनि अन्धकारमा बस्न नपरोस् नगरप्रमुख
नगरपालिकाले विगत तीन वर्षदेखि लहानलाई ‘मोतियाविन्दुमुक्त नगर’ बनाउने लक्ष्यका साथ यो कार्यक्रम सञ्चालन गर्दै आएको छ ।
नगरप्रमुख महेशप्रसाद चौधरीले आफ्नै नगरमा विश्वस्तरीय अस्पताल हुँदाहुँदै नागरिकहरू दृष्टिविहिनको सिकार हुन नपरोस् भनेर यो कदम चालिएको बताए ।
‘हाम्रो नगरमै एसियाकै उत्कृष्ट आँखा अस्पताल छ । यति नजिक सुविधा हुँदाहुँदै हाम्रा नागरिक पैसाको अभावमा दृष्टिविहिन भएर बस्नुपर्ने निकै दुःखद कुरा हो,’ उनले भने, ‘कोही पनि नगरवासीले आर्थिक अभावका कारण ज्योति गुमाउन नपरोस् भनेर सम्पूर्ण खर्च नगरपालिकाले व्यहोर्ने निर्णय गरेका हौँ ।’
नगरप्रमुख चौधरीका अनुसार चालु आर्थिक वर्षमा मात्रै नगरका २४ मध्ये १५ वटा वडामा शिविर सम्पन्न भइसकेका छन् । अस्पतालका शिविर संयोजक राजकुमार राउतका अनुसार पछिल्ला तीन आर्थिक वर्षमा सञ्चालित शिविरहरूमार्फत हालसम्म १७ हजारभन्दा बढी नगरवासीको निःशुल्क आँखा जाँच गरिएको छ ।
यस क्रममा मोतियाविन्दु पहिचान भएका करिब २ हजार ५०० विपन्न बिरामीको निःशुल्क शल्यक्रिया गरिएको छ भने दृष्टिमा समस्या भएका ८ हजारभन्दा बढी व्यक्तिलाई निःशुल्क चस्मा तथा औषधि उपलब्ध गराइएको छ ।
नेपालका विभिन्न जिल्ला र छिमेकी देश भारतबाट समेत गरी वार्षिक रूपमा करिब २५ लाख बिरामीलाई सेवा दिइरहेको सगरमाथा चौधरी आँखा अस्पतालको प्राविधिक सहयोग र नगरपालिकाको अठोटले लहानका सयौँ ज्येष्ठ तथा विपन्न नागरिकलाई नयाँ जीवन दिएको छ ।
