काठमाडौँ । नेकपा (एमाले) का नेता ऐन महरविरुद्ध मुद्दा दर्ता भएको छ।
सरकारी वकिलको कार्यालय काठमाडौंले सोमबार साइबर अपराधको अभियोगसहित काठमाडौं जिल्ला अदालतमा महरविरुद्ध मुद्दा दायर गरेको हो।
अब अदालतमा महर उपस्थित भएपछि उनलाई थुनामा पठाउने वा धरौटीमा रिहा गर्ने, वा हाजिर जमानीमा राख्ने भन्ने विषयमा थुनछेक बहस हुनेछ।
महरमाथि विद्युतीय कारोबार ऐन, २०६३ को दफा ४७ अन्तर्गत अपराध गरेको आरोप लगाइएको छ। एक महिलामाथि सामाजिक सञ्जालमा लाइभ गर्दै चरित्रहत्या गरेको र मेसेज तथा स्टाटसमार्फत गालीगलौज गरेको पीडितको दाबी छ। महर भदौ ११ गते प्रहरी समक्ष हाजिर भएका थिए। उनले सरकारी वकिलको कार्यालय काठमाडौंमा त्यही दिन बयान दिएका थिए।
बयान दिएसँगै उनी हाजिर जमानीमा छुटेका थिए। महरले ती महिलाविरूद्ध पनि सोही कसुरमा जाहेरी दिएका छन्। भदौ ११ गते नै ती महिलाको पनि बयान लिएर हाजिर जमानीमा राखिएको थियो।
