काठमाडौँ । नेकपा एमालेका उपाध्यक्ष सुरेन्द्र पाण्डेले नेपालको संविधानले कोही पनि व्यक्तिलाई पार्टीमा निषेध नगरेकाले कुनै पार्टीले रोक्न नमिल्ने बताएका छन् ।
सोमबार काठमाडौँमा भएको ‘एमालेमा आन्तरिक लोकतन्त्र’ विषयक अन्तर-संवाद कार्यक्रममा बोल्दै उपाध्यक्ष पाण्डेले पूर्वराष्ट्रपति विद्या भण्डारीलाई पनि कुनै पार्टीको सदस्य नहुन भनेर संविधानले कतै बन्देज नलगाएको बताएका हुन् । ‘राष्ट्रपतिलाई पनि पार्टीको सदस्य नहुनु भनेको छैन’, पाण्डेले भने– ‘संविधानले ३ वटा अवस्थाको मात्रै चर्चा गरेको छ ।’ संविधानको त्यो व्यवस्था अनुसार निर्वाचित भएको पद, मनोनीत भएको पद र नियुक्ति भएको पद राष्ट्रपति भएपछि स्वतः जाने र त्यो बाहेक अरू कुनै व्यवस्था नरहेको पाण्डेको भनाइ छ ।
‘संविधानले नगरेको कुरा कुनै एउटा पार्टीले विधान बनाएर रोक्न मिल्छ र ?’, प्रश्न गर्दै पाण्डेले भने– ‘निर्णय गरेर रोक्न मिल्छ र ?’ यस्ता विषयहरूमा प्रजातान्त्रिक अधिकारलाई उल्लङ्घन गर्ने कुनै पनि प्रजातान्त्रिक पार्टीले गर्न नमिल्ने पाण्डेको भनाइ छ ।
