काठमाडौं। भिजिट भिसा प्रकरणमा मुछिएका गृहमन्त्री रमेश लेखकले संसद् बैठकमा बोल्ने वातावरण बनाइदिन आग्रह गरेका छन् । राज्य व्यवस्था तथा सुशासन समितिको बैठकमा बुधबार बोल्दै गृहमन्त्री लेखकले भिजिट भिसा प्रकरणका बारेमा संसदमा बोल्ने वातावरण निर्माण गरिदिन आग्रह गरेका हुन् ।
‘जिज्ञासा यो समितिका साथीहरूलाई मात्रै भएको भए यहीँ जवाफ दिएर जान्थेँ,’ बैठकमा समिति सदस्यहरूले भिजिट भिसाबारे राखेको जिज्ञासातर्फ इङ्गित गर्दै उनले भने,‘अरू साथीहरूलाई पनि यो जिज्ञासा भएकाले मेरो प्रार्थना के छ भने सदनमा बोल्न पाउँ। उठेका सबै प्रश्नको जवाफ दिन्छु।’
गृहमन्त्री लेखकले आफूमाथि प्रतिपक्षमा रहेका दलहरूले भिजिट भिसाबारे लगाएका आरोपको जवाफ संसदमा दिने पनि बताए ।
त्रिभुवन अन्तर्राष्ट्रिय विमानस्थल अध्यागमन कार्यालयका प्रमुख तीर्थराज भट्टराई भिजिट भिसा सेटिङमा संलग्न रहेको आशङ्कामा अख्तियार दुरुपयोग अनुसन्धान आयोगले पक्राउ गरेको थियो ।
उनी पक्राउ परेपछि गृहमन्त्री लेखक पनि भिजिट भिसा प्रकरणमा मुछिएका छन् भन्ने विषयलाई लिएर प्रतिपक्षी दलहरूले गृहमन्त्रीको राजीनामा माग गर्दै संसद बैठक अवरुद्ध गर्दै आएका छन् ।
