काठमाडौं। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई जनयुद्धकालको मानसिकता त्याग्न आग्रह गरेका छन्। आन्दोलनस्थलमा सञ्चारकर्मीसँग कुरा गर्दै लिङ्देनले अहिलेको समय २०५२ सालको जस्तो नभएको स्पष्ट पार्दै प्रचण्डलाई ‘भ्रमजालबाट मुक्त हुन’ सुझाव दिएका हुन्।
भर्खरै राजधानीमा राजावादी कार्यकर्ता र वाईसीएलबीच भएको झडपको सन्दर्भमा बोल्दै लिङ्देनले वाईसीएल कार्यकर्ताहरूलाई पनि ‘भ्रममा नरहन’ आग्रह गरे।
“वाईसीएलका भाइहरू भ्रममा हुनुहुन्छ,” उनले भने, “उहाँहरूले भन्ने गरेको जनयुद्धताकाको समय अब छैन। अब त्यो भ्रममा नरहन आग्रह गर्छु।”
लिङ्देनले वर्तमान समय जनताको सचेतताको युग भएको भन्दै, डर र त्रासको शासन दोहोरिन नसक्ने चेतावनी दिए। “जनयुद्धको बेलाजस्तो तपाईंको समय छैन,”
लिङ्देनले प्रचण्डलाई सम्बोधन गर्दै भने, “जनता जागरूक भइसकेका छन्, तपाईंको भ्रमजालबाट मानिसहरू मुक्त भइसकेको अवस्था छ। हिजोको जस्तै मान्छेलाई तर्साएर मुनि राख्न सकिन्छ भन्नेबाट अलग हुनुस् र सुध्रिनुस्।”
उनले प्रष्ट पारे कि यो संघर्ष कुनै व्यक्तिविरुद्ध होइन, “गणतन्त्रको नाममा स्थापित लुटतन्त्र” विरुद्ध हो। “त्यसमा जो अगाडि आउँछ, जनताले प्रतिवाद गर्छन्,” लिङ्देनले भने।
भ्रष्टाचार र त्यसको संरचनाविरुद्ध जीवनभर लडिरहने संकल्प दोहोर्याउँदै उनले भ्रष्टहरूलाई कारबाही नभएसम्म विश्राम नलिने बताए। “भ्रष्टहरूलाई खोरमा नहाली विश्राम लिँदैनौं,” लिङ्देनको चेतावनी थियो।
पछिल्लो समय राजावादीहरु राजसंस्थाको पुनःस्थापनासहित जनसंवेदना उठाउँदै सडकमा देखिएका छन् , जसको नेतृत्व लिङ्देन आफैंले गरिरहेका छन् ।
