काठमाडौं। नेकपा माओवादी केन्द्रले काठमाडौं उपत्यकामा केन्द्रित ‘नेवा र ताम्सालिङ जागरण अभियान’ आजबाट सुरु गरेको छ। अभियानको उद्घाटन कार्यक्रममा पार्टी अध्यक्ष पुष्पकमल दाहाल ‘प्रचण्ड’ प्रमुख आकर्षणका रूपमा उपस्थित भएका हुन्।
प्रचण्डले कार्यक्रमको सुरुवातमै भाषणकै शैलीलाई लिएर आलोचनात्मक टिप्पणी गरे पनि आफूले भने झन्डै ४० मिनेट लामो मन्तव्य दिए।
प्रचण्डले प्रारम्भमै भाषण धेरै भएको भन्दै ‘यसरी अभियान नचल्ने’ चेतावनी दिए। उनले भने, “यो कार्यक्रम अलि भाषण धेरै भयो जस्तो लाग्यो मलाई। यसरी धेरै बोलेर मान्छेलाई थकाएर, वाक्क बनाएर अभियान हुँदैन।” कार्यक्रम हलमा उपस्थित कार्यकर्ताहरू प्रचण्डको यस्तो प्रस्तुति सुन्दै हुटिङ र ताली बजाउँदै उत्साहित देखिएका थिए।
यद्यपि भाषणको आलोचना गर्दै सुरु गरे पनि प्रचण्डले सरकार, राष्ट्रिय राजनीति र पार्टी अभियानका विषयमा विस्तारमा बोले । उनले पार्टी कार्यकर्तालाई एक महिनासम्म मिहिनेत गरेर जनतामाझ परिणाम दिन आग्रह गरे।
त्यसैगरी, “भाषण गरेर जनतालाई नथकाउनुहोला,” भन्दै उनले नेताहरूलाई बढी सुन्ने र कम बोल्ने शैली अवलम्बन गर्न सुझाव दिएका छन् ।
