काठमाडौं। एमालेमा अहिले झोले संक्रमण अथवा झोले अभियान सुरु भएको छ। एमाले निकट नेपाल बुद्धिजिवी परिषद्को ११औं महाधिवेशन गत जेठ १७ गते काठमाडौंको टोखामा सुरू भएसंगै महाधिवेशनको प्रमुख अतिथि भएर प्रधानमन्त्री तथा एमाले अध्यक्ष केपी शर्मा ओली उक्त कार्यक्रमबाट पहिलोपटक ‘झोले’ शब्दलाई धेरै नै जोड दिएर झोले परिष्कृत संस्कृतीको अध्याय सुरु गर्न सफल भएका हुन् ।
ओलीले त्यसदिन,‘मलाई अलिकति पनि अप्ठेरो लाग्दैन, म जनताको झोला बोकेर हिँड्ने मान्छे हुँ । जनताको हितहरूको झोला बोक्ने, जनताको हितको झोला बोक्ने, गौरवको झोला बोक्ने,परिवर्तनको झण्डा उठाउने झोले हुँ, के भयो त झोले बन्दा ?’भनेका थिए ।
प्रधानमन्त्री ओली त्यतिमै रोकिएनन् । देश संक्रमणकालमा रहेको र सही निकास खोजिरहेकाले परिस्थितिमा सुधारका लागि बुद्धिजीवीको भूमिका रहने भएकाले त्यस अनुसार सक्रिय हुन आग्रह पनि उनले गरे ।
प्रधानमन्त्री ओलीले भने,‘म एमालेको झोले हुँ । यस देशका जनताको झोले हुँ । अब भयो चित्त बुझ्यो प्रतिक्रियावादीहरूलाई ? यतिभन्दा एमालेको विरोधीहरूलाई चित्त बुझ्छ होला । म यो झोलामा देश र जनताको परिवर्तनको चाहनालाई बोकेर हिँड्छु । यसमा मलाई गर्व छ,’
उनले त्यो दिन,जेमा पनि खोट देख्ने तथाकथित आलोचनात्मक चेतनाबाट माथि उठ्न उनले आग्रह समेत गरेका थिए । उनको आग्रहलाई बुद्धिजिवीहरूले कसरी लिए त्यो त कसैलाई थाहा छैन। तर यस्तो घोषणा गरेको दुई दिनपछि सोमबार प्रधानमन्त्री ओलीले आफूलाई झोले भन्दै सामाजिक सञ्जाल फेसबुकमा आफू झोले भएको पोस्टर पोष्ट गरेका छन् ।
साथमा दुई हात जोडेको तस्वीर राखेर ओलीले ‘झोले’ भएको लेखेका छन् । ‘म झोले हो । एउटा सामन्ती परिवारको दास बन्नु भन्दा देशमा परिवर्तन र विकासको झोला बोकेर हिँड्नु कयौं गुणा उत्तम चरित्र हो’,पोस्टरमा लेखिएको छ ।
प्रधानमन्त्री ओलीले पोस्टर बाहेक पनि स्टाटस लेखेका छन् । जहाँ ओलीले ‘झोले आरोपबाट नडराउन कार्यकर्तालाई प्रोत्साहन गरेका छन् । ‘सामाजिक सञ्जालमा झोले भनेर खेदियो भन्दैमा सत्य अँगाल्न नछोडौं । सामुहिक र संगठित आक्रमणबाट हरेकले आफ्नो निजत्व जोगाउन पर्छ’, ओलीले लेखेका छन् ।
प्रधानमन्त्री ओलीले ‘म झोले हुँ’ भन्दै सार्वजनिक रूपमा पोस्टर सार्वजनिक गरेपछि त्यसले नेकपा एमालेभित्र नयाँ प्रचार अभियानको रूप लिएको छ। ओलीको पदचाप पछ्याउँदै एमालेका शीर्ष नेतादेखि सामान्य कार्यकर्तासम्मले आफूलाई ‘झोले’ घोषणा गर्न थालेका छन्।
उपप्रधान तथा अर्थमन्त्री विष्णु पौडेल, पार्टी महासचिव शंकर पोखरेल, प्रधानमन्त्रीका प्रमुख राजनीतिक सल्लाहकार विष्णु रिमाललगायत नेताहरूले सामाजिक सञ्जाल फेसबुकमा ‘म झोले हुँ’ भन्ने घोषणा गर्दै स्टाटस लेखिसकेका छन्।
एमालेका सामान्य कार्यकर्ताहरूले पनि ‘म झोले हुँ’ लेखिएको पोष्टरमा आफ्ना फोटो टाँसी सामाजिक सञ्जालमा पोष्ट गर्न थालेका छन् । फेसबुक र ट्विटरजस्ता प्लेटफर्महरूमा यस्ता पोष्टहरू छ्यापछ्याप्ती देखिन थालेका छन्।
