काठमाडौं। राजसंस्थाको पक्षमा राजावादीहरूले सुरू गरेको संयुक्त आन्दोलनलाई आज पनि निरन्तरता दिएका छन् । आज नयाँ स्थान नारायणचौरमा जनप्रदर्शनको कार्यक्रम रहेपनि हिजोजस्तै बालुवाटार घेराउ गर्न जाने योजना बनाइएको छ ।
आजको आन्दोलनका लागि २ बजे नारायणचौरमा भेला हुन सूचित गरिएको थियो । नारायणचौरबाट जुलुसलाई वार्म अप गराएर बालुवाटारतर्फ लाग्ने तयारी रहेको राप्रपा नेपालका एक नेताले बताएका छन् ।
हिजो राजावादी प्रदर्शनकारीहरूले बालुवाटारको निषेधित क्षेत्र नतोडिकन प्रदर्शन गरेका थिए । आज पनि हिजैको स्थानमा प्रदर्शन गर्ने तयारी छ । तर, सरकारले अनावश्यकरूपमा कडाइ गर्न खोज्यो भने टकरावको अवस्था आउन सक्ने चेतावनी राजावादी नेताहरूले दिएका छन् ।
काठमाडौंका प्रमुख जिल्ला अधिकारी ऋषिराम तिवारीले बालुवाटारमा प्रदर्शन गर्न नपाइने बताएका छन् । राजावादीहरू बालुवाटार जाने भन्ने आफूले पनि सुनेको उनको भनाइ रहेको छ ।
त्यस्तै,सुरक्षा स्रोतले आज राजावादीहरूलाई कडाइ गरिने पुष्टि गरेको छ । यद्यपि,नारायणचौरमै रोक्ने हो वा बालुवाटारको निषेधित क्षेत्रबाहिरसम्म आउन दिने हो भन्ने अन्यौलमा रहेको स्रोतले बताएको छ।
