काठमाडौं। परराष्ट्रमन्त्री डा. आरजु राणा देउवा चीनको विशेष प्रशासनिक क्षेत्र हङकङको भ्रमण सकेर स्वदेश फर्किएकी छन्। उनले चीन सरकारद्वारा जेठ १६ गते आयोजित ‘अन्तर्राष्ट्रिय मध्यस्थता संगठन’ स्थापनासम्बन्धी महासन्धिको हस्ताक्षर समारोहमा सहभागी भएर शनिबार राति फर्केकी हुन्।
समारोहमा सहभागी हुन मन्त्री राणा गत बुधबार चिनियाँ विदेशमन्त्री वाङ यीको निमन्त्रणामा हङकङ पुगेकी थिइन्। नेपाल यस समारोहमा पर्यवेक्षकको रूपमा सहभागी भएको हो।
उक्त महासन्धिमा ३२ मुलुकले हस्ताक्षर गरेका थिए भने समारोहमा ५० भन्दा बढी देश र २० भन्दा बढी अन्तर्राष्ट्रिय संघसंस्थाको सहभागिता थियो। प्रस्तावित मध्यस्थता संगठनले विभिन्न मुलुकबीच, देश र कम्पनी/नागरिकबीच तथा निजी व्यवसायहरूबीच उत्पन्न हुने विवादहरूलाई मध्यस्थतामार्फत समाधान गर्ने लक्ष्य राखेको छ।
हङकङमा आयोजित कार्यक्रममा सहभागी रहने क्रममा मन्त्री डा. राणाले चिनियाँ विदेशमन्त्री वाङ यीसँग द्विपक्षीय भेटवार्ता गरेकी थिइन्। उक्त भेटमा नेपाल–चीन सम्बन्धलाई थप सुदृढ बनाउने, आर्थिक, प्राविधिक तथा व्यापारिक सहकार्य विस्तार गर्ने र चीनको सहयोगमा निर्माणाधीन परियोजनाहरू समयमै सम्पन्न गर्ने विषयमा कुराकानी भएको जानकारी उनले दिइन्।
भ्रमणका क्रममा मन्त्री राणाको नेतृत्वमा रहेको नेपाली प्रतिनिधिमण्डलमा परराष्ट्र मन्त्रालयको उत्तरपूर्व एशिया महाशाखाका प्रमुख भृगु ढुंगाना, हङकङस्थित नेपालका महावाणिज्यदूत डा. विन्देश्वरप्रसाद लेखक तथा परराष्ट्र मन्त्रालय र महावाणिज्यदूतावास हङकङका अन्य प्रतिनिधिहरू सहभागी थिए।
