काठमाडौँ। राष्ट्रिय स्वतन्त्र पार्टी (रास्वपा) का प्रवक्ता तथा सांसद मनिष झाले भिजिट भिसाका नाममा विदेश जान खोज्दा ठगिएका नेपालीहरूको एक हजारभन्दा बढी प्रमाण चौबिस घण्टामै संकलन भएको दाबी गरेका छन्। रास्वपाका सांसदहरूले सुरु गरेको प्रमाण संकलन अभियानमा यस्तो उल्लेख्य संख्या सहभागी हुनु गम्भीर विषय भएको झाको भनाइ छ।
उनले भने, “बुधबारदेखि म, सोविता गौतम, शिशिर खनाल, हरि ढकाल लगायतका सांसद तथा साथीहरूले सामाजिक सञ्जालमार्फत प्रत्यक्ष पीडितहरूसँग प्रमाण माग गरेका थियौँ, “२४ घण्टामै एक हजारभन्दा बढी प्रमाण प्राप्त भयो।”
झाका अनुसार ती प्रमाणहरूमा नेपाली नागरिकहरू भिजिट भिसामा विदेश जाँदा ठगीमा परेका, यौनजन्य हिंसाको शिकार भएका, बाकसमा शव भएर फर्किनुपरेको,ठूलो रकम बुझाउँदा पनि रोजगारी नपाएको जस्ता गम्भीर घटनाहरू समेटिएका छन्। “हजारौँ नेपालीहरू पीडामा छन्, ठगिएका छन्। राज्य मौन रहँदा नागरिकले न्याय पाउँदैन,” उनले भने ।
उनले पछिल्ला पाँच वर्षमा सात लाखभन्दा बढी नेपाली भिजिट भिसामा विदेश गएको तथ्यांक सार्वजनिक गर्दै तीमध्ये करिब २० हजार जनालाई त्रिभुवन अन्तर्राष्ट्रिय विमानस्थलबाटै फिर्ता पठाइएको जानकारी दिए।
झाका अनुसार यो अभियान कुनै व्यक्तिगत रिसीबी वा आक्रोशबाट प्रेरित नभई सुशासन र नागरिक सुरक्षाका लागि गरिएको हो। “यो गृहमन्त्रीविरुद्धको व्यक्तिगत आक्रोश नभई प्रणाली सुधारको अभियान हो,” उनले स्पष्ट पारे ।
रास्वपाका सांसदहरूले संकलन गरिएका प्रमाणहरू सम्बन्धित निकायमा बुझाउने तयारी गरिरहेका छन्। साथै, उनीहरूले थप सत्य तथ्य सार्वजनिक गर्दै गम्भीर अनुसन्धान र दोषीमाथि कडा कारबाहीको माग गरेका छन्।
भिजिट भिसा प्रकरणमा गृह मन्त्रालयका सचिवालय तहका कर्मचारीको संलग्नता देखिएपछि गृहमन्त्री रमेश लेखकमाथि चौतर्फी दबाब बढ्दो छ। राजीनामाको मागसमेत सार्वजनिक रूपमै उठ्न थालेको छ ।
यता अख्तियार दुरुपयोग अनुसन्धान आयोगले त्रिभुवन विमानस्थल अध्यागमन कार्यालयका प्रमुख तीर्थराज भट्टराईसहित पाँच जनाविरुद्ध अनुसन्धान अघि बढाएको छ। उनीहरूका मोबाइल, ल्यापटपजस्ता विद्युतीय उपकरण बरामद गरी प्राविधिक विश्लेषण भइरहेको आयोगले जनाएको छ।
