गोर्खा। प्रतिज्ञा अधिकारी
आमा,भविष्य बनाउन घरबाट निस्केकी
तिम्री छोरी. ..
घरको आँगन नाघेर केही अघि बढ्दासम्म त
छोरी थिइ. ..
आमा,सुन्दर भविष्य बनाउँछु भन्ने सपना बोकेकी
तिम्री छोरीले,अन्जानमा आफ्नो सुन्दर जवानी नै गुमाइसकि,
आमा,तिमी गर्व गर्दै हिड्न छोडिदेऊ
अब गाउँमा,मेरी छोरी संस्कारी छ,इमान्दारी छ
यस्ती छुस्ती छ भन्दै हिड्न छोडिदेऊ,
जति तिमिले जति संस्कार दिएर संस्कारी बनाए पनि,
जति नै इमान्दार भएपनि
आज यो भुसिया पुरुष भएको समाजमा
आफ्नै अस्मिता जोगाउन सकिन मैले,
अब आश राख्न छाडिदेऊ आमा,
छोरीको भविष्य फूल जस्तै सुन्दर हुन्छ भनि!!
केही बर्षको यो
फूल जस्तो सुन्दर जवानी त,हेर्न नसक्ने यो समाजले
तिम्रो छोरीको भविष्य सुन्दर कसरी हेर्न सक्ला ?
बरु,सक्दो नङ्ग्याउलान् मलाई सामाजिक सञ्जालमा,
सकेजति,एसिड प्रहार गर्लान् मेरो कोमल चेहेरामा,
बरु,सयौंले एकै पटक इज्जत लुट्न खोज्लान् ।
भयो,अब आश राख्नै छाडिदेऊ आमा,
अब,छोरीको र छोरी मात्र नामको मात्र छोरी भई,
किनकी घरबाट निस्किँदा छोरी मात्र भएकी छोरी
अहिले यो समाजले मेरो पहिचान बदलिदियो,
मेरो नामको सट्टा चरित्रहिन,भनि बोलाउने गरेको छ।
मलाई सक्छौं भने माफ गर है,आमा
तिम्ले नौ-नौ महिना कोखमा सुरक्षित राखेर,
यतिका वर्ष हुर्काइ-बढाइ गर्यौ
तोते-तोते बोल्न सिकायौ,
ताते-ताते गर्दै हिड्न सिकायौ,
तर आज आफ्नै खुट्टामा उभिने भएपछि
इज्जत जोगाउन सकिन तिम्री छोरीले,
माफ गरिदेउ आमा,
छोरीको सुन्दरजिवनको कल्पना पनि नगर आमा,
बिहे पछी ठिक होला भन्ने, झिनो आशा पनि नराख।
किनकी तिम्ले ज्वाइँ मानेर खुट्टाको पानी खाएकोले नि
केही दिनमै मेरो चरित्रमा दाग लगाउदै
शरिर भरि निल डामको दाग भरिदिन्छ,,,
हे!!आमा,अब तिम्रो छोरी,छोरी मात्र भइन्,
बलत्कृत भई अनि चरित्रहिन भई,
अरु के-के भइसकि तिम्री छोरी,
आमा,अझै छोरीको सुरक्षा गर्छु भन्ने आँट आउछ तिमिलाई
भो कोसिस नगर आमा ,
तिमी तिम्रो छोरीलाई सुरक्षित देख्न
र,देखिरहन चाहान्छौ भने,
तिम्रो कोखमै मात्र सिमित राख मेरो जिवनलाई
त्यो स्वर्ग जस्तो कोख देखि नजन्माउ
यो दुष्टै-दुष्ट बस्ने समाजमा
बरु मलाई तिम्रै कोखमा मात्र सिमित राख,
म त्यहा नौ जुनि सुखै सुखले बाँच्छु
(संस्कारी र छोरी मात्र भएर)।
बिन्ति आमा!!
बरु मलाई तिम्रै कोखमै मात्र सिमित राख ।
