चन्द्र पन्तको डेव्यु निर्देशनमा निर्माण हुने सिनेमामा ‘ह्रस्व दीर्घ’मा कलाकार प्रवेशको शिलशिला रोकिएको छैन । साउथका ब्रह्मानन्दमदेखि अभिनेत्री विपना थापासम्म अनुबन्धित भैसकेको सिनेमामा थप चार जना कलाकारको प्रवेश भएको छ । सिनेमाका लागि अभिनेता नरेन खड्का, कमेडियन आदर्श मिश्रा, लक्ष्मी पौडेल, वसिम राजासँग निर्माण टिमले सम्झौता गरेको हो ।
नीता फिल्मस्को ब्यानरमा निर्माण हुने सिनेमामा नीता ढुंगाना र हरिहर अधिकारीको मुख्य भूमिका रहनेछ । केही दिनदेखि सिनेमाको मुम्बईमा वर्कसप चलिरहेको छ । अहिले हरिहर र नीतासहित अन्य कलाकारहरु मुम्बईमा छन् । माघ अन्तिम साताबाट भारतको हैदराबादस्थित संसारकै सबैभन्दा ठूलो रामोजी स्टुडियोमा सिनेमाको छायांकन सुरु हुँदैछ । भारतपछि नेपालमा छायांकन हुनेछ ।
बलिउडका कवीरलालको छायांकन रहने सिनेमामा गरिमा शर्मा, सरोज खनाल, रविन्द्र झाका साथै साउथ सिनेमाबाट सुनिल वर्मा, प्रदीपराज रावत र अली पनि अनुबन्धित भइसकेका छन् । नेपाली र हिन्दी भाषामा एकसाथ निर्माण हुने सिनेमालाई नेपाल तथा भारतका सिनेमा हल र प्रतिष्ठित ओटीटी प्लेटफर्ममा रिलिज गर्ने तयारी भैरहेको निर्माण टिमले जानकारी दिएको छ ।
