काठमाडौँ । म्यान्मारमा शक्तिशाली समुद्री आँधी ‘मोचा’का कारण आइतबारयता ८१ जनाको मृत्यु भएको छ । म्यान्मारस्थित मानवअधिकारवादी संस्थाहरूका अनुसार अल्पसङ्ख्यक रोहिंग्या मुसलमानको बसोबासस्थल रखाएन राज्यको बुमा र समीपको खाउङ डोके कार गाउँमा मात्र कम्तीमा ४६ जनाले ज्यान गुमाएका छन् ।
आँधीका कारण एक सयभन्दा बढी हराइरहेकाले ज्यान गुमाउनेको सङ्ख्या अझै बढ्ने बताइएको छ । आइतबार बंगलादेश हुँदै मोचा आँधी म्यान्मार पुगेको थियो । प्रतिघण्टा १९५ किलोमिटरको गतिमा आएको उक्त आँधीले घरहरू भत्काएको छ भने रुख तथा बिजुलीका पोल भाँच्चिएका छन् । आँधीका कारण हवाई मार्गहरू बन्द भएका छन् ।
म्यान्मारको सैन्य सरकारले भने देशभर मात्र २१ जनाको मृत्यु भएको जनाएको छ । रखाएन राज्यमा मारिएका अल्पसंख्या रोहिंग्या मुस्लिमबारे सैन्य सरकारले कुनै तथ्यांक नराखेको बताइएको छ । यद्यपि, सार्वजनिक भएका भिडियोहरूमा भने रोहिंग्याको आश्रयस्थलहरूमा मोचाले ठूलो क्षति पुर्याएको देखिएको छ । शरणार्थीका लागि संयुक्त राष्ट्रसंघीय उच्चायुक्त यूएनएचसीआरका अनुसार सैन्य सरकारले रोहिंग्याको बस्तीमा आवश्यक सहयोग सामग्री पुर्याउन पनि गएका छैनन् ।
सन् २०२१ मा सेनाले देशको शासन सत्ता फेरि कब्जा गरेपछि म्यान्मारको मानवअधिकारको अवस्था ज्यादै कमजोर बनेको छ । सेनाले जुन्ता शासनविरुद्ध प्रदर्शन गर्नेलाई सिधै गोली हान्ने गरेको छ । त्यहाँकै बहुसंख्यक बौद्ध धर्म मान्ने जनताका अधिकारहरू कुण्ठित भएका बेला रोहिंग्या मुसलमानको अवस्था झनै दयनीय भएको बताइन्छ ।
