काठमाडौं । नेपालमा चिनियाँ प्रिमियम विद्युतीय सवारी ब्रान्ड स्काईवेलको आधिकारिक आयातकर्ता परिवर्तन भएको छ। उत्पादक कम्पनीले जी मोटर्ससँगको सम्झौता अन्त्य गर्दै एलआरआर मोटर्सलाई नयाँ आधिकारिक आयातकर्ता नियुक्त गरेको हो।
एलआरआर मोटर्सले वाणिज्य विभागबाट आवश्यक एजेन्सी दर्ता प्रक्रिया पूरा गरिसकेको जनाएको छ। कम्पनीले स्काईवेलका नयाँ गाडी भित्र्याउनुअघि नै स्पेयर पार्ट्स उपलब्ध गराएर पुराना ग्राहकलाई बिक्रीपछिको सेवा सहज बनाउने तयारी गरेको छ।
नयाँ जिम्मेवारीसँगै एलआरआर मोटर्सले आगामी नाडा अटो शोमा स्काईवेलका नयाँ मोडल सार्वजनिक गर्ने तयारी गरिरहेको छ। कम्पनीका अनुसार प्रतिस्पर्धी मूल्यमा विद्युतीय एसयूभी बजारमा ल्याउने लक्ष्य राखिएको छ।
यसअघि जी मोटर्सले स्काईवेलका गाडी बिक्री गर्दै आएको भए पनि अपेक्षाअनुसार बजार विस्तार गर्न नसकेपछि उत्पादक कम्पनीले आधिकारिकता फिर्ता लिएको हो। उक्त निर्णयविरुद्ध जी मोटर्स अदालत पुगे पनि अन्तरिम आदेश भने प्राप्त गर्न सकेन।
एलआरआर मोटर्सले अब स्काईवेलका गाडीको आयात, बिक्री, वितरण तथा बिक्रीपछिको सम्पूर्ण सेवा सञ्चालन गर्नेछ। कम्पनीले यस कदमले नेपाली विद्युतीय सवारी बजारमा आफ्नो उपस्थिति अझ सुदृढ हुने विश्वास व्यक्त गरेको छ।
