चितवन । २५ जनाको ज्यान लिइसकेको जंगली ‘ध्रुवे’ हात्तीलाई नियन्त्रणमा लिएर उसका दाह्रा छोट्याइने र नयाँ रेडियो कलर जडान गरिने भएको छ।
चितवन राष्ट्रिय निकुञ्जका प्रमुख संरक्षण अधिकृत डिलबहादुर पुर्जा पुनका अनुसार हात्ती भेटिएलगत्तै ‘डार्ट’ गरेर बेहोस बनाइनेछ। त्यसपछि उसका दाह्रा काट्नुका साथै नयाँ रेडियो कलर जडान गरिनेछ, जसबाट हात्ती बस्तीतर्फ आएमा समयमै सूचना दिएर स्थानीयलाई सतर्क गराउन सहज हुनेछ।
ध्रुवेले गत शनिबार भरतपुर–२३ मा २१ वर्षीया आशिका बोटे र उनका चार वर्षीय छोरा भरत बोटेको ज्यान लिएको थियो। यससँगै उक्त हात्तीको आक्रमणबाट मृत्यु हुनेको संख्या २५ पुगेको निकुञ्जले जनाएको छ।
निकुञ्जका अनुसार ध्रुवेको निरन्तर निगरानी भइरहेको छ। यसअघि पनि उसका दाह्रा काटिएको र रेडियो कलर जडान गरिएको थियो। चितवन राष्ट्रिय निकुञ्जमा सबैभन्दा बढी मानवीय क्षति गराउने जंगली हात्तीका रूपमा परिचित ध्रुवेलाई नियन्त्रणमा लिएर थप दुर्घटना रोक्ने तयारी गरिएको निकुञ्जले जनाएको छ।
