काठमाडौं । नेपाल वैदेशिक रोजगार महिला व्यवसायी संघले नेपाल वैदेशिक रोजगार व्यवसायी संघको वैधानिक नेतृत्वविरुद्ध पछिल्लो समय भइरहेका भ्रमपूर्ण प्रचार, अफवाह तथा संस्थागत अस्थिरता सिर्जना गर्ने गतिविधिप्रति गम्भीर ध्यानाकर्षण भएको जनाएको छ ।
संघकी कार्यवाहक अध्यक्ष तारा रेग्मीद्वारा जारी विज्ञप्तिमा केही स्वार्थ प्रेरित समूहले सामाजिक सञ्जाल र अनधिकृत अभिव्यक्तिमार्फत व्यवसायीहरूलाई भ्रमित पार्ने, संघभित्र कृत्रिम विवाद सिर्जना गर्ने तथा वैधानिक नेतृत्वमाथि अनावश्यक प्रश्न उठाउने प्रयास गरिरहेको आरोप लगाइएको छ ।
महिला व्यवसायी संघले यस्ता गतिविधि कुनै व्यक्ति वा नेतृत्वविरुद्ध मात्र नभई सम्पूर्ण वैदेशिक रोजगार व्यवसायी समुदाय, संस्थागत प्रणाली तथा व्यावसायिक एकतामाथिको सुनियोजित प्रहार भएको ठहर गरेको छ ।
विज्ञप्तिमा जिल्ला प्रशासन कार्यालय काठमाडौंले विभिन्न पक्षबाट प्राप्त निवेदन तथा उजुरीमाथि अध्ययन गरी जारी गरेको निर्देशनलाई समेत केही पक्षले तोडमोड गरी गलत अर्थ लगाउँदै भ्रम फैलाउने प्रयास गरिरहेको उल्लेख गरिएको छ । तर प्रशासनको पत्रले वर्तमान कार्यसमिति तथा अध्यक्ष भुवन सिंह गुरुङकै नेतृत्वलाई विधान, प्रचलित कानुन र संस्थागत प्रक्रियाअनुसार संघ सञ्चालन गर्न स्पष्ट निर्देशन दिएको दाबी गरिएको छ ।
महिला व्यवसायी संघका अनुसार प्रशासनको उक्त पत्रमा कतै पनि वर्तमान नेतृत्वलाई अवैधानिक भनिएको छैन, न त कुनै अन्य समूहलाई संघको आधिकारिकता प्रदान गरिएको छ । बरु संघलाई विधिसम्मत, मर्यादित र संस्थागत प्रक्रियाअनुरूप सञ्चालन गर्न वर्तमान नेतृत्वलाई जिम्मेवारीसहित अगाडि बढ्न निर्देशन गरिएको उल्लेख गरिएको छ ।
विज्ञप्तिमा नेपाल वैदेशिक रोजगार व्यवसायी संघको वैधानिक नेतृत्व व्यवसायीहरूको अत्यधिक मतबाट निर्वाचित अध्यक्ष भुवन सिंह गुरुङकै नेतृत्वमा रहेको वर्तमान कार्यसमितिमा निहित रहेको स्पष्ट पारिएको छ ।
साथै व्यवसायीहरूको हकहित संरक्षण, क्षेत्रका समस्याको समाधान तथा संस्थागत सुदृढीकरणका लागि वर्तमान नेतृत्वले गरिरहेका प्रयासप्रति नेपाल वैदेशिक रोजगार महिला व्यवसायी संघको पूर्ण ऐक्यबद्धता र समर्थन रहेको जनाइएको छ ।
संघले वैदेशिक रोजगार क्षेत्र अहिले नीतिगत जटिलता, प्रशासनिक दबाब, अन्तर्राष्ट्रिय प्रतिस्पर्धा, आर्थिक चुनौती तथा श्रम बजारमा देखिएका नयाँ परिस्थितिसँग जुधिरहेको उल्लेख गर्दै यस्तो संवेदनशील अवस्थामा व्यवसायीलाई एकताबद्ध बनाउनुको सट्टा संस्था कमजोर पार्ने, भ्रम फैलाउने र विभाजनको वातावरण सिर्जना गर्ने गतिविधि सम्पूर्ण व्यवसायी समुदायको हित विपरीत रहेको जनाएको छ ।
विज्ञप्तिमा श्रम, रोजगार तथा सामाजिक सुरक्षा मन्त्रालयसँग वैदेशिक रोजगार क्षेत्रका ज्वलन्त समस्या समाधान, व्यवसायमैत्री नीतिगत सुधार तथा व्यवसायीको साझा हितका विषयमा महत्त्वपूर्ण संवाद भइरहेका बेला वातावरण बिथोल्ने र संस्थागत एकतालाई कमजोर बनाउने प्रयास दुर्भाग्यपूर्ण रहेको उल्लेख गरिएको छ ।
महिला व्यवसायी संघले सम्पूर्ण व्यवसायीलाई सामाजिक सञ्जालमा फैलाइएका अफवाह, भ्रामक सूचना तथा स्वार्थ प्रेरित प्रचारप्रति सचेत रहन आग्रह गर्दै आधिकारिक निकायबाट जारी भएका निर्णय, वैधानिक प्रक्रिया तथा संस्थागत मर्यादालाई आधार मानेर मात्रै धारणा निर्माण गर्न अनुरोध गरेको छ ।
साथै संघले वैधानिक नेतृत्वविरुद्ध निरन्तर भ्रम फैलाउने, संस्थागत गरिमा कमजोर बनाउने तथा व्यवसायीबिच विभाजन सिर्जना गर्ने गतिविधिलाई नजिकबाट नियालिरहेको जनाउँदै आवश्यक परे कानुनी, संस्थागत तथा नैतिक सबै माध्यमबाट सशक्त प्रतिवाद गरिने चेतावनी दिएको छ ।
“नेपाल वैदेशिक रोजगार व्यवसायी संघ कुनै व्यक्ति, गुट वा सीमित स्वार्थ समूहको सम्पत्ति होइन, यो हजारौँ व्यवसायीहरूको संघर्ष, योगदान, विश्वास र आस्थाले निर्माण भएको साझा संस्था हो,” विज्ञप्तिमा उल्लेख छ ।
महिला व्यवसायी संघले अन्त्यमा अहिलेको आवश्यकता विवाद, आरोप–प्रत्यारोप र भ्रमको राजनीति नभई व्यवसायीको अस्तित्व रक्षा, संस्थागत एकता, व्यावसायिक सम्मान तथा वैदेशिक रोजगार क्षेत्रको भविष्य सुरक्षित गर्ने साझा अभियान भएको उल्लेख गर्दै सम्पूर्ण व्यवसायीलाई अध्यक्ष भुवन सिंह गुरुङ नेतृत्वको वैधानिक कार्यसमितिको पक्षमा उभिएर एकताबद्ध हुन आह्वान गरेको छ ।
