नेपाली कांग्रेसका महामन्त्री विश्वप्रकाश शर्माले राष्ट्रिय स्वतन्त्र पार्टी (रास्वपा)का सांसद र नेता, कार्यकर्ता ‘जेलका कैदी’ भएको टिप्पणी गरेका छन् । बुधबार प्रतिनिधिसभा बैठकमा महामन्त्री शर्माले सहकारी ठगी मुद्दामा थुनामा रवि लामिछाने भए पनि बाहिर भएकाहरू उनको आदेश मान्ने कैदीकै भूमिकामा देखिएको आरोप लगाए ।
उनले कांग्रेस छोडेका नेताहरूलाई कांग्रेस छाडेसँगै आलोचनात्मक चेत र निर्धक्क बोल्ने तागत दुवै गुमाएको बताए ।
“साथीहरू बाहिर चाहिँ हुनुहुन्छ । तर, जेलको कैदीझैँ आदेश मान्न बाध्य हुनुहुन्छ,” शर्माले व्यंग्य गर्दै भने, “कांग्रेसभित्रै हुँदामात्रै हो, यहाँबाट गएपछि त्यही तागत राख्नुहुन्छ भन्ने अपेक्षा गर्दिनँ ।”
कुनै बेला अदालतको आदेशमा विमति राख्नेमाथि खरो उत्रिने रवि लामिछानेले अहिले भने सिंगो पार्टी अदालतविरुद्ध परिचालन गरिरहेको बताए । उनले रास्वपाको हस्ताक्षर अभियानमा पनि प्रश्न उठाए । लामिछानेले राजनीतिमा नआउँदै ‘के रे के रे ? अदालतको आदेश नमान्ने रे, तिम्रो बाउको अदालत हो ?’ भन्दै दिएको अभिव्यक्ति सम्झाउँदै शर्माले हस्ताक्षर अभियानलाई व्यंग्य गरेका हुन् ।
“हिजो त्यसरी बोल्ने अनि आज हस्ताक्षरमार्फत के रे के रे कसलाई दबाब दिन खोजेको ? हस्ताक्षरमार्फत यो देशमा अदालतहरूमा वा कसलाई दबाब दिन खोजेको ?,” व्यंग्यात्मक शैलीमा शर्माले भने, “कुनै अस्पताललाई, क्याम्पसलाई कि अदालतलाई ?”
उनले यति भनेर रास्वपाले अहिले संसद्मा राखिरहेको मागका विषयमा पनि टिप्पणी गरे । आफू पहिलोपटक संसद्मा काम गरिरहेको भन्दै उनले रास्वपा पनि आफूजस्तै नयाँ भएको बताए । नयाँहरूका लागि संसद् सिक्ने थलो भएकाले आफूले भनेका सबै कुरा लागु नहुने उनको भनाइ छ ।
“हामी सिक्ने क्रममा छौँ । सबै आफ्नो दृष्टिकोण बुझाइहरू संसद्ले मान्नुपर्छ भन्ने मेरो गोरुको अठारै टक्का भन्ने कुरामा म जानुहुन्न र मजस्तै साथीहरूले जानुहुन्न,” शर्माले भने, “प्रश्न नयाँ पुरानो होइन, प्रवृत्तिको हो ।”
