काठमाडौ। सदनमा देखिएको गतिरोध लगायत विषयमा छलफल गर्न प्रधानमन्त्री केपी शर्मा ओलीले प्रमुख दलका शीर्ष नेताहरूको बैठक बोलाएका छन् ।
प्रधानमन्त्री तथा मन्त्रिपरिषद्को कार्यालय सिंहदरबारमा,जारी छलफलमा प्रधानमन्त्री एवं नेकपा एमालेका अध्यक्ष ओली,नेपाली कांग्रेसका सभापति एवं पूर्व प्रधानमन्त्री शेरबहादुर देउवा,नेकपा माओवादी केन्द्रका अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ सहभागी छन् ।
यस्तै,छलफलमा भिजिट भिसा प्रकरणमा मुछिएका गृहमन्त्री रमेश लेखक, कांग्रेस उपसभापति पूर्णबहादुर खड्का, माओवादीका महासचिव देव गुरुङलगायतका नेताहरू सहभागी छन् ।
प्रतिपक्षमा रहेका दलहरूले गृहमन्त्री लेखकले राजीनामा नदिएसम्म संसद् बैठक सुचारु हुन नदिने अडान लिइरहेका छन् । सोही विषयमा छलफल गर्न प्रधानमन्त्री ओलीले प्रमुख दलका शीर्ष नताहरूको बैठक बोलाएका हुन् ।
तीन दलका शीर्ष नेताहरूको बैठक सुरु हुनअघि माओवादी अध्यक्ष प्रचण्डले अर्को प्रतिपक्षी दल नेकपा समाजवादी केन्द्रका अध्यक्ष माधवकुमार नेपालसँग छलफल गरेका थिए । उनले कांग्रेस सभापति देउवासँग पनि टेलिफोनमा कुराकानी गरेका थिए ।
