काठमाडौं । निर्वाचन प्रहरीको पोसाक खरिदमा अनियमितता भएको दाबीबारे संसदीय उपसमितिले प्रारम्भिक अध्ययन सुरु गरेको छ। नेपाल प्रहरी र सशस्त्र प्रहरी बलबाट प्राप्त कागजातका आधारमा उपसमितिले अध्ययन थालेको हो।
राष्ट्रिय स्वतन्त्र पार्टीका सांसद मनिष झाको संयोजकत्वमा गठित नौ सदस्यीय उपसमितिले प्राप्त कागजात समितिमै राखेर सीसीटीभी निगरानीमा अध्ययन गर्ने व्यवस्था मिलाएको छ। अध्ययन निष्पक्ष रूपमा गरिने र निष्कर्षमा नपुगी कसैलाई दोषी नठहराउने उपसमितिको तयारी छ।
२१ फागुनको प्रतिनिधिसभा निर्वाचनका लागि नेपाल प्रहरी र सशस्त्र प्रहरी बलले कुल १ लाख ४९ हजार ९० जना निर्वाचन प्रहरी भर्ना गरेका थिए। उनीहरूको पोसाकका लागि सरकारले करिब एक अर्ब रुपैयाँ निकासा गरेको थियो।
निर्वाचन प्रहरीलाई उपलब्ध गराइएको पोसाकको गुणस्तर र खरिद प्रक्रियामाथि प्रश्न उठेपछि सार्वजनिक लेखा समितिले उपसमिति गठन गरेको हो। उपसमितिले कात्तिक ३० गतेसम्म प्रारम्भिक अध्ययन पूरा गर्ने र त्यसपछि थप छलफल गरी प्रतिवेदन तयार गर्ने जनाएको छ।
