काठमाडौँ । चाडपर्वका बेला कुनै शङ्कास्पद वा आपराधिक गतिविधि देखिए तत्काल प्रहरीलाई खबर गर्न नेपाल प्रहरीले नागरिकलाई आग्रह गरेको छ।
नेपाल प्रहरीका प्रवक्ता तथा प्रहरी नायब महानिरीक्षक अबिनारायण काफ्लेले नागरिकबाट समयमै प्राप्त हुने सूचनाले ठुला अपराध तथा दुर्घटना रोक्न सहयोग पुग्ने बताए। उनले शङ्कास्पद गतिविधि देखिए नजिकको प्रहरी कार्यालय वा प्रहरीको निःशुल्क १०० नम्बरमा खबर गर्न आग्रह गरे।
प्रहरीले सूचना दिने व्यक्तिको गोपनीयता कायम गरिने जनाएको छ। चाडपर्व लक्षित सुरक्षा योजनाअन्तर्गत सम्भावित अपराध रोकथामका लागि देशभर ५० हजारभन्दा बढी प्रहरी परिचालन गरिएको छ।
यात्रु सुरक्षाका लागि देशभर ४०८ स्थानमा तथा अन्तर्राष्ट्रिय सीमा नाकामा १०८ वटा सहायता कक्ष स्थापना गरिएको प्रहरीले जनाएको छ। चोरी, डकैती, लुटपाट, जुवातास, अवैध सट्टेबाजी तथा कालोबजारी नियन्त्रणमा विशेष निगरानी बढाइएको छ।
यस्तै, डिजिटल ठगी, फिसिङ, नक्कली अनलाइन अफर, फेक इन्भेस्टमेन्ट तथा एआईबाट सिर्जित नक्कली आवाज र भिडियोबाट हुने ठगीप्रति पनि प्रहरीले नागरिकलाई सचेत गराएको छ।
चाडपर्वमा घरबाहिर जाने नागरिकलाई घर खाली रहेको जानकारी सामाजिक सञ्जालमा नराख्न, झ्यालढोका बन्द गर्न तथा नगद, गरगहना र महँगा सामानको सुरक्षामा ध्यान दिन प्रहरीले आग्रह गरेको छ।
