२२ असोज, काठमाडौं । अमेरिकी राष्ट्रपति डोनाल्ड ट्रम्पले आफूले आठवटा युद्ध अन्त्य गराएको दाबी गर्दै नोबेल शान्ति पुरस्कार आफूले पाउनुपर्ने बताएका छन् ।
बुधबार ओभल अफिसमा पत्रकारहरूसँग कुरा गर्दै ट्रम्पले आफू नोबेल शान्ति पुरस्कारका लागि योग्य रहेको दाबी गरेका हुन् । उनले कुनै पनि अमेरिकी राष्ट्रपतिले यसअघि आफूले जस्तो युद्ध अन्त्य गराउन नसकेको जिकिर गरे।
‘कुनै पनि राष्ट्रपतिले कहिल्यै युद्ध अन्त्य गराएका छैनन् । मैले आठवटा युद्ध अन्त्य गराएँ र सम्भवतः विश्वलाई पूर्ण रूपमा ध्वस्त हुनबाट पनि जोगाएँ,’ ट्रम्पले भने, ‘त्यसैले मैले नोबेल शान्ति पुरस्कार पाउनुपर्छ।’
सन् २०२६ को नोबेल शान्ति पुरस्कार नोर्वेजियन नोबेल समितिले शुक्रबार घोषणा गर्ने कार्यक्रम छ। पुरस्कारबारे पत्रकारले सोधेको प्रश्नमा ट्रम्पले समितिको निर्णयबारे आफूलाई जानकारी नभएको बताए।
उनले आफूजस्ता व्यक्तिलाई समितिले पुरस्कार नदिन सक्ने आशंका पनि व्यक्त गरे। ‘उनीहरूको यस्तो छवि छ कि सायद उनीहरूले म जस्ता मानिसलाई यो पुरस्कार दिँदैनन्,’ उनले भने।
दोस्रोपटक अमेरिकी राष्ट्रपतिमा निर्वाचित भएदेखि नै ट्रम्पले आफू नोबेल शान्ति पुरस्कारको हकदार रहेको दाबी गर्दै आएका छन्। यसपटक उनले आफूले पुरस्कार पाउने समय आएको हुनसक्ने बताएका छन्।
यसअघि भेनेजुएलाकी विपक्षी नेतृ मारिया कोरिना मचाडोले जनवरीमा आफ्नो सन् २०२५ को नोबेल शान्ति पुरस्कारको पदक ट्रम्पलाई हस्तान्तरण गरेकी थिइन्। ट्रम्पले यसलाई आफूले अप्रत्यक्ष रूपमा नोबेल सम्मान पाएको रूपमा व्याख्या गरेका छन्।
दोस्रो कार्यकाल सुरु गरेदेखि ट्रम्पले विश्वका विभिन्न द्वन्द्व अन्त्य गर्न आफूले भूमिका खेलेको दाबी गर्दै नोबेल शान्ति पुरस्कारका लागि आफ्नो दाबी प्रस्तुत गर्दै आएका छन्।
